I whakaeke atu kō Te Ariki Tā Tumu Te Heuheu, ā tōmuri mai ko te Kīngitanga me āna rahi. I whakatakotoria ko ngā āwangawanga mō TPPA ka tamokohia a te tuawhā o Hui-Tanguru.
Hei tā ētahi kāre rātou i te paku mārama ki te TPPA nā reira kāre e kore ka werohia atu te kāwanatanga mō tēnei take i tā rātou whakaeke ki Ratana āpopo
Mā ngā pūoro o te hāhī ngā manuhiri e ārahi ana ki Ratana Pa.
A he wero ta etahi ki te hunga e kawea ana i te kaupapa TPPA.
Ki tā Rahui Papa, “Kaore au i te mōhio mēnā e tautoko ana, e whakahē ana rānei, i te mea, kua munaia ngā kōrero i āu, kua kore au e āhei ki te pānui i te huhua o ngā korero, ki te mohio mēnā he painga kei roto, he hahanitanga kei roto ranei.”
“Kotahi noa te korero kua rongo nei au, ara ko te māngai o ngā minita. engari mēnā e titiro ana rātau mai i ngā mowhiti o te minita, kaore au i te whakaae.”
Ahakoa kāore anō te pirimia kia tae mai, kei reira ētahi whakaetanga, ki te whakatakoto i ēnei kaupapa ki konei.
E ai ki a Marama Fox o te Pāti Māori, “Te nuinga o te wā me hāere te marea ki paremata, ki ngā tepe o te paremata. ki waho ki te ua, ki te marangai, kōrero ai, tēnei wā, taea te korero ā tinana, ā kanohi nei, ki mua i te aroaro o te Māori, o te iwi, i runga i nga kaupapa Māori.”
Kua puta te kōrero ia Rātana, he hiahia nō rātau ki te kawe i ēnei āhuatanga, i runga i te rangimārie. Ēngari e ai ki te mema pāremata mō Te Taihauāuru a Adrian Rurawhe, kei te whakarite rātau, ki te whiu kōrero ki te pirimia.
Ahakoa ngā whiu tōrangapū, he wāhi ki te whakapūmau i ngā hononga i waenganui i te Kīngitanga me Rātana.
Ko tā, Rahui Papa, “Te painga o te Mārena, ka whawhai, ka raruraru, ka tohetohe, ēngari, ko te painga o tēnei mārena, kāore anō kia pūremu.”
Engari he mārena anō kei te āta tirohia.
Ki tā Rahui ano, “hei āpōpō te mai ai te kāwanatanga. i ētahi tau, i etahi tau he hoariri. Apopo ko wai ka hua ka mōhio.”
He te rā e tū mai nei, mōhio ai, te katoa.
