Kei te whai atu ngā uri o te rangatira nō Te Arawa a Pikiao i ōna tapuwae ki tōna kainga tūturu a te maunga tapu o Taupiri. Koinei te wā tuatahi i kitea ai ēnei uri i taua kainga mai i tana taenga atu i ngā tau ono rau ki muri.
E hīkoi ana ngēnei tamariki i te ara tapuwae o tō rātou ihorei ki tōna pā tawhito o Te Ao Whaaki, i tū i konei e whia rau tau ki muri.
“Tino harikoa tōku wairua mō tēnei haerenga,” i mea atu te tauira a Matiu Mear (Ngāti Pikiao, Ngāti Whakaue).
“He maha ngā mea pai i mahi mātou. Kei te whai mātou i ngā huarahi o o mātou tupuna, ko Pikiao.”
E manaaki ana te marae o Taupiri i ngā tauira e waru tekau nō Te Kura o Whangamarino kia mōhio ai ngā uri ki ō rātou tātai whakapapa i te rohe o Waikato me te Kiingitanga.
I mua atu i te wehenga atu a Pikiao mai i Te Arawa, i kī ake ai te koroua Kawatapuarangi, ko te matua nei a Pikiao, "Mā wai e hari ai taku kauae moko ai ki tāwāhi?" Anei, ka tū mai a Pikiao haere mai a Pikiao ki konei ki te whai, whai wahine māna.
Mō ngā tamariki ngā rangatira mō āpōpō Rehua Mihaka, pouako, Te Kura o Whangamarino.
“Nō reira, ko rātou ngā kaipupuru i ngā korero, ko rātou hoki hei kawe tonu i ngā korero mō āpōpō anō.”
E ono rau tau ki muri i tae atu a Pikiao ki Waikato ki te kimi wahine hei whakawhānau uri tane māna. I tana wehenga atu i te Pā o Te Ao Whaaki, ka haere ia ki Pirongia i reira moe ai i tōna wāhine tuarua ko Rereiao.
“Ka puta ko Hekemaru, ka heke iho mai āe, a Hekemaru ka heke i a te ure taarewa, nā rā ka tū te Pā nei a Pikiao haere mai āna uri anei, Te Kāwai whakapapa o tō mātou whare e tīrama nei,” i kōrero atu a Tarawhiti.
Whai muri i te takahanga nei a ngā uri o Ngāti Pikiao ki te maunga tūpuna o Taupiri, ka aru haere rātou i te takahanga a tō rātou rangatira ki Pirongia āpōpō.
