Ka whai oranga tonu te waetikape nei a Hikawera Elliot i te Kapa Chiefs i roto i te tauwhāinga Super Rugby.
Tērā te pōhēhē i mutu kē ngā rā tākaro a te uri o Ngāti Awa me Kahungunu i te wharanga o tōna kakī i te tukinga Ōpango Māori ki a Kānata i te tau rua mano tekau mā toru.
I tata heke a ia i te tākaro whutupōro, engari i reira anō te pūkeke kia ora anō ai ia.
E hia kē nei ngā marama e whakamauora ana a Elliot kia nakawhiti anō ai ia.
I puta te whakatau ka noho a Elliot hei kaitākaro whakakapi, me te manako nui ka tohua ia ki te kapa rua tekau mā rua.
I puta ia hei toki mā te kapa o Poverty Bay i tērā tau i te whakataetae Heartland, he mea whakaae e Mutu Ngarimu, kaiako o Poverty Bay.
Nā te wharanga o Elliot i karanga ai a Quentin MacDonald ki te kapa Ōpango Māori, ko ia anō tērā ka kawe i ōna wheakotanga ki te kapa Chiefs i te tau nei.
Hei tāna anō, ko te whai kōwhiringa ki te tira Ōpango mō te Ipu o te Ao i te tau nei tētahi pae tawhiti ōna.
