Kei te whakakotahi atu ētahi tauira nō Waikato ki te whakaatu i a rātou kōrero tuku iho mā roto i ngā mahi whakaari. Ko "A Change in Time" te īngoa o te whakaaturanga, ā, ka whakaatu tuatahitia hei te wā o te Koroneihana a tērā wiki.
He hokinga mahara ki ngā mahi muruwhenua i pā ki a Waikato i ngā rua tekau tau ki muri, he kaupapa i awe mai i te whakaaturanga rongonui a "Happy Feet".
E ai ki a Keihana Kingi Takoko, “Ko te kaupapa ko Happy Feet. Ko te pai o te ora. Ahakoa ngā piki me ngā heke he orite ki a mātou.”
He whakaaturanga tēnei e whakamiha ana ki te hunga i putakiri i ngā mamae nui o te raupatu whenua a Waikato-Tainui ki te Karauna.
Hei tā Keihana Kingi Takoko, “Mā te aha i te noho tahi a ngā kura rerekē i raro i tēnei whakaaro kotahi, tēnei kaupapa kotahi.”
E kite ai hoki ngā kaumātua kei te pai ngā rangatira o āpōpō me ngā mahi tautoko i te iwi a haere ake nei.
Ka whai wāhi hoki ētahi tūranga tūpuna nō Tainui Waka, pērā i te kāpene a Hoturoa.
Tōna hoa rangatira hoki a Whakaotirangi.
Me ētahi atu tūpuna o te Kīngitanga. He kaupapa hei whakamānawa i ngā hiahia a rātou mā.
Ki tā Ora Kihi, “Kia kite ai te iwi anei ngā whakaaro o ngā taitamariki e pā ana ki te raupatu ki roto i ngā āhua whakaari ki runga i te whakaaro ngahau.”
Kua kotahi marama tēnei hunga mai i ngā kura Māori o Tainui e whakarite ana mō te whakaaturanga.
Nō reira kia mau ki a koutou nei tūru, ka whakaaturia te whakaari a te Rāapa a tērā wiki ki Te Wharekura o Rākaumangamanga.
