He whakakotahi mai i ngā ohu kaitiaki e toru kia tū i raro i te maru kotahi te mahi ki Tauranga Moana mō te Rūnanga o Ngāi Te Rangi, te ohu whakatau o Ngāi Te Rangi me te tarahiti o Ngā Potiki. Ko te whāinga ia he whakatika i te ara kia pai ake ai ngā hua.
Kua kotahi tau nō te hainatanga o te whakataunga kereme o Ngāi Te Rangi, ā, he toru tekau miriona tāra i tukuna atu ki a rātou. Heoi e ai ki te kaiwhakahaere o Te Ohu Whakatau o Ngāi Te Rangi a Maru Samuels, he rautaki tāna kia pai ake ai te whakahaerenga o ngā rawa a te iwi.
E ai ki a Maru Samuels,” I tēnei wā e rua ngā pōtitanga rerekē, ā, me utu i taua kaupapa, he tuku i ngā reta, me ngā tāngata whakahaere i aua kaupapa. Kāore e kore he rua tekau ki te rua tekau mā rima mano taara te pūtea ka penapena i roto i te tau kotahi.”
I tēnei wā he poari kei ia o ngā tarahiti e toru, ā, katoa rātou ka whakahaere i ngā rawa a te iwi. Ko tā te rautaki hōu he pupuri tonu ki ngā tarahiti, engari ka kotahi noa te poari hei whakahaere i ngā rawa.
Hei tā Maru Samuels, “I kōrero tahi mātou me te iwi, kia whai i te huarahi e noho harikoa tātou katoa. Tē taea ki te whakakore i ngā tarahiti e toru, engari ka taea pea ki te panoni i te āhuatanga mahi a ngā tarahiti.”
Ki te taha pōti poari noa iho, he rua rau mano tāra ngā moni ka penapenatia i ngā tau tekau. Heoi ko tā Maru, tērā ētahi i wero i te rautaki hōu.
Ko Maru Samuels tērā e mea ana, “Tērā ngā wero mō te panonitanga o te pōtitanga a-rūnanga nei, ki tērā e kiia ana he mahi ā-hapori, hapū, ko te hapū me te hapori e mahi ngātahi ana.”
Hei te rua tekau mā ono o Mahuru mutu ai te pōti. Kia tutuki tēnei rautaki hōu me whitu tekau mā rima ōrau te nui o ngā pōti.
