Ka whakanui ngā whānau i te rā o Waitangi

I tae atu a tini, a mano ki ngā hui taurima puta noa i a Tāmaki Makaurau i te rā nei ki te mātakitaki atu i ngā whakaatūranga, te kai me te whakakotahi atu ki ngā whānau o te hāpori.

Ka whakaputa whakaaro te hapori mō te rā o Waitangi:

"Ko te mea nui, kia ngahau tahi ai tatou, ahakoa ngā mea o mua, ngā raruraru me kī."

"He rā honohono i te ao katoa kia haere mai kia whakakotahi tātou i a tātou."

"He kaupapa anō kia mōhio ērā atu o ngā iwi o ngā iwi, o ngā whānau aha atu, ko Waitangi tētahi mea kaupapa nui ki te ao Māori."

He mārea i tae atu nō ngā whenua puta noa ki te kite i ētahi o ngā tikanga a te Māori.

E ai kit e kaihāpai tikanga Māori ki a Tūnuiārangi McLean, "Te kite i ngā tāngata huhua, Pākeha mai, o tātou whanaunga o ngā moutere. I kōrero ahau ki ētahi o ngā tāngata o tāwahi o Awherika ki te tonga, i tiro rātou ki tēnei o ngā kaupapa me tā rātou mīharo."

Kāore he mahi whakatūtū i kitea, engari kē ko te wairua o te kotahitanga i kitea i tēnei o ngā rangi.