He kōrero whakamataara kua tukua e Ngāti Whātua Ōrākei ki te kāwanatanga kia whakamana rātou i ngā kupu ka tāngia ki ngā whārangi o Te Tiriti o Waitangi i runga i tēnei, te rā i hainatia te Tiriti e tā rātou tūpuna, e Āpihai Te Kāwau e kotahi rau whitu tekau mā waru tau ki muri.
He kai mā te hinengaro te kaupapa nei o Ngāti Whātua Ōrākei kia whakanui i te rā o Waitangi, me tō rātou tūpuna.
E ai ki a Sharon Hawke, uri o Ngāti Whātua Ōrākei, he tīmatanga noa iho tēnei.
Nā tō rātou tūpuna a Āpihai Te Kāwau te Tiriti o Waitangi i waitohu i te rua tekau o Poutū Te Rangi i te tau kotahi mano e waru rau whā tekau. Nānā ētahi whenua i koha ki te karauna mō te taone o Tāmaki.
Ko tā Taiaha Hawke, māngai o Ngāti Whātua Ōrākei, "Kei te āhua pōuri mātou nō te mea kāore ngā kaumātua o aua wā i kite ngā hua i puta mai i tō rātou mahi."
I muri tonu i te hainatanga i raupatuhia te nuinga o te whenua o Ngāti Whātua atu i tētahi pito whenua mō te urupā ki Ōkahu. Kāore a Ngāti Whātua mō te tuohu noa ki te kāwanatanga, ā, i noho rātou ki Takaparawha mō te rima rau mā ono rā. Inaianei kua tipu te wāriu o a rātou rawa ki te iwa rau miriona tāra.
Ko tā Hawke, "I āhua matemate haere te iwi, kua ngaro haere te reo me ngā tikanga nā reira ka nui te aroha mō tērā, Heoi, kei te anga whakamua a Ngāti Whātua Ōrākei inaianei."
Anō i a Hawke, me noho pono te kāwanatanga i tā rātou noho hei hoa tiriti. "Me ū tonu te kāwanatanga ki ngā kupu kua tuhia, ngā kupu kua kōrerohia, ki ngā whakaaro kia mahi tahi te kāwanatanga me Ngāti Whātua Ōrakei."
Engari, he kaupapa anō kei mua i te aroaro o te iwi, arā ko te whakamaharatanga ki te tūtūnga puehu ki Takaparawha hei te rua tekau mā rima o Haratua.
