Ehara ko te reo anake te mea nui ki te iwi o Tonga e noho nei ki Aotearoa.
Ko te whāngai i ngā mokopuna ki ngā tikanga o Tonga, otirā ki ngā mātāpono o ō rātou tīpuna, ki te taha wairua, te taha hinengaro anō hoki te tino kaupapa a hāpaitia ana i tēnei wiki, Te Wiki o te Reo Tonga.
Koinei ētahi o ngā tamariki mokopuna i heke iho i ngā kāwai rangatira o Tonga engari i whānau mai, ā, e tipu ana ki Aotearoa nei.
Kei raro ēnei mokopuna i ngā akoranga Api Fakakoloa, he kaupapa ako ka tīmata mai ki roto i ngā kāinga.
Hei tā Barron Tavake Afeaki, ko te tino kaupapa, “Kia hāpai kia tautokona i ngā kuia, ngā mātua, ngā koroua o ngā whānau Tonga, kia whakaako ai o rātou tamariki i roto o rātou ake kāinga.
Ko tēnei te Wiki o Te Reo Tonga 2014, a ko ngā iwi Tonga kei Aotearoa nei ngā mea e tino akiakitia ana kia ū mai ki te kaupapa o te wiki.
Ko Barron Tavake Afeaki tērā e mea ana, “Te tino wero ki a mātou ngā uri o ngā motu rā i konei i Aotearoa nei, ko te nuinga o ngā mea i roto i te reo Pākehā.”
Nā reira kei roto i ngā mahi whakanui o Uike Lea Faka - Tonga, ko te reo, ko ngā tikanga, ko ngā waiata, ka rongohia ka kitea, whānuitia ki te motu, ā, mā ngā tamariki mokopuna hei para i te huarahi, ki Aotearoa nei.
