Ka whakapaua e te kāwanatanga te $72 miriona kia whakapai ake i ngā roto o Rotorua

Ko te orangatonutanga o ngā roto i te takiwā o Rotorua ka whakatairangatia e te kāwanatanga, hēoi ko te kaupapa whakapaipai ka rua tekau mā whā tau e kōkirihia ana, ā, tata ki te kotahi rau, whā tekau mā rima miriona tāra te utu.

E ai ki te heamana o te poari roto o Te Arawa, ki a Ta Toby Curtis, e tika ana me whakatika e te kawanatanga ngā raru nāna anō i whakarite.   

Rua tekau ma wha miriona tāra kua whakatahahia e te kawanatanga hei whakaora i ngā roto moana o tēnei takiwā, he tuahuatanga e tautokohia ana e Arapeta Tahana mema o te kaunihera taiao o tēnei takiwā.

Nō te tau rua mano mā waru i whakaae te kawanatanga kia whāngai i te whitu tekau mā rua miriona tāra ki tēnei kaupapa hei whakaora i ngā roto moana. 

E ai ki a Toby Curtis, te putea kātahi anō ka whakatahahia e te kawanatanga no tērā whitu tekau mā rua miriona tāra. 

I timata ngā mahi tirotiro i te oranga o te wai ki ngā roto moana o tēnei takiwā e rua tekau mā toru tau ki muri.  I kite ake i roto i ērā rangahau, tokowhā ngā roto moana me whai whakaaro hei whakaora, ko Te Rotoiti, Okareka, Rotoehu me Rotorua.  

Ko te raru nui, ko ngā paru e uru ana ki roto i ēnei roto. 

Kotahi rau, whā tekau mā whā ira rua miriona tāra te katoa o ngā utu mō ngā mahi whakaora i ngā roto moana, mā te kāwana te haurua o ngā utu mahi e kawe, ka taka mai te toenga ki ngā kaunihera o tēnei takiwā.