Ka whakaputa te Pāti Māori i tā rātou rārangi mema

Kei te tūnga tuawhitu te ika āwhiro porotēhi, a Tame Iti, i te rārangi mema o Te Pāti Māori, ā ko te mātanga haka, ko Eraia Kiel kei te tūnga tuawaru. 

Koinā ngā tino kitenga i te whakarārangitanga mai o te rua tekau mā whā kaitono o Te Pāti Māori e whakataetae ana i te kōwhiringa i tēnei te tau rua mano tekau mā whā.

Ehara i te mea ohorere kei te tūnga tuatahi o te rārangi kapa o te Pāti Māori, a Te Ururoa Flavell, ko ia anake kei roto i te Whare Pāremata i tēnei wā, heoi ko te tūmanako e kore ia e noho takitahi āmuri ake nei.

Kua whakahē ētahi i tā rātou korenga e hono atu ki te hunga rangatahi, i tēnei kōwhiringā, he tokoono o ngā kaitono tekau, kei raro iho i ngā tau pakeke whā tekau mā rima.

I tēnei wiki kua whakaputa a Tame Iti i tana hiahia kia hoe i te waka o te Pāti Māori, a kua whai mana ia ki te tūnga tuawhitu.

Kāore anō te Pāti Māori i mau i te rima ōrau kia puta atu ngā mema tōrangapū o te rārangi ki te whare, ēngari mā ngā tūru Māori rātou e whai mana ai ki te Whare Mīere.

Kei te whakapono te kaiārahi takirua o te pāti, a Te Ururoa Flavell, ka tae atu anō ia ki taua taumata.

E whā ngā wiki e toe ana ki te rā pōti, heoi he mārama te kite kei a Te Ururoa Flavell te kaha kia whiwhi i ngā pōti e hiahiatia ana e tōna pāti.