He raru ki tai tā David Cunliffe i te ata nei, i a ia e whakamamao atu ana i a Shane Taurima me ōna wawata tōrangapū.
Ehara i te ohorere, he kōrero whakaiti ta ētahi o ngā mema tōrangapū o te rōpū Reipa.
Hei tā Tau Henare, "I ngā wā i noho tahi māua ko Taurima mō tana hōtaka te take, kua tītaha tana aro mai ki ahau, ki ētahi atu hoki, atu i ngā mema o te Rōpū Reipa."
Heoi e ai ki a Paula Bennett, "I kaha wero mai ia ki ngā wāhine Māori o te Nāhinara."
Ki tā te pirimia a John Key, kei te rōpū whakahaere a TVNZ te kōrero whakamutunga, ā, kāre ōna raru mō tā Taurima āhua uiui.
"He ruarangi āna uiuitanga ki ahau, kāore aku māharahara mōna."
Ehara ngā hononga a Taurima ki te roopu reipa i te kōrero muna, ā, ahakoa he ngutu kākā a Shane Jones, kua noho mū a ia mō Taurima me ōna hiahia.
“Mā te wa ka titiro pena manaakitia ana tona ingoa e ngā kaiwhakahaere o te Pāti”
Hei te rua tekau mā waru o tēnei marama, katia ai te wā mō ngā kaitono reipa ki Tāmaki Makaurau, ā, ka katia pea ngā tatau mō Shane Taurima me ōna wawata tōrangapū.
