Hei te toru tekau mā tahi o tēnei mārama ka hanga Vogue te āhua ki Rotorua, nā runga i tētahi huinga ka whakatairanga i ngā āhuatanga o te tuitui kākahu ki Rotorua.
I kōrero a Te Kāea ki te mātanga kaihanga tuitui kākahu e kawe ana i tēnei kaupapa.
Nō Ahia te kākāno o te whakaaro, ā, ko ēnei kaka te puawaitanga mai. Ka whakaaturia ēnei kākāhu rerehua ki tētahi whakakitenga ka tū ki Rotorua, ā, mō te kaiwaihanga a Kharl Wirepa, ko te hoahoa kaka tōna oranga.
Hei tā Kharl Wirepa, “Ka noho ko Oho hei pō nui whakaharahara mō Rotorua. Kāore he pō i kō atu mō tōna ātaahua, ko tōna kaupapa ia he hiki i te rangatahi.”
I tua atu i ngā kākāhu, ka kitea hoki ngā mahi a ngā ringa mākohakoha o muri, pēnei i ngā pani kanohi me ngā kiri mau.
E ai ki a Mereana Matekino-Thocolich, “Ka kite i te iwi Māori e hanga ana i ngā piupiu, i ngā whāriki i ngā pari, i ngā tipare te aha rā, te aha rā engari he pai ki te uru atu i ēnei momo mahi mai i a Tauiwi ki ngā mahi o Māori, hei whakakotahi, kia hangaia i ēnei momo kākahu kia whakanui i te ahurea Māori.”
Adriana Whitewood, Mereana Ngatai, Maree McLean me Leilani Richard koinei ētahi o ngā īngoa kei te tautoko i tēnei kaupapa.
Ki tā Kharl Wirepa, “Me kite mai te ao, Rotorua me Aotearoa i ngā pūkenga o ngā kaiwaihanga nō konei, kia tautokohia ai o rātou moemoeā. He nui ngā pito mata kei konei, nāreira me hiki rātou.”
Ka tū te whakakitenga hei te toru tekau mā tahi o tēnei marama ki te whare VR Lakes Resort, Rotoiti.
