Kaore ētahi o Ngāti Hine e whakae ana ki te whakaritenga o ngā māngai

E kaha whakahē ana tētahi pou o Ngāti Hine i te whakatūnga ake o tētahi uri o Ngāti Hine me ētahi atu hei māngai mō Ngāti Hine ki runga i Te Mana Motuhake o Tūhoronuku. E whai ana tēnei i putanga mai o ngā ingoa o ērā ka tū hei māngai ki te rōpu kōkiri i te huarahi whakatatū i tētahi whakataunga tiriti ki waenga i a Ngāpuhi me te Karauna.

E whakapono tonu ana te Tumu Here o Te Rūnanga o Ngāti Hine, a Te Waihoroi Shortland, mā Ngāti Hine anō a Ngāti Hine e kōrero, kaua mā Tūhoronuku. E ai ki a Te Waihoroi Shortland, “Koinei ngā mahi tāhae a nga Minita o te Karauna, koinei ngā mahi tahae a Tūhoronuku me Te Runanga a iwi o Ngāpuhi, koia ka whakahē tonu nei, kahore anō tēnei pakanga kia tata noa te eke.”

Hei tā Te Waihoroi Shortland, he koni ake i te 1000 ngā waitohu nā ngā uri o Ngāti Hine ake, kua kohia ake nā runga i te whakahē ki te whakatūnga o ngā mema hapū o Te Pēwhairangi, ka tū hei māngai mō Ngāti Hine me ētahi o ngā hapū o tērā taiwhenua, ki te Rōpū Motuhake o Tūhoronuku, kua whakamanangia e te Karauna kia whakatatū i tētahi whakataunga tiriti me te Karauna.

Ko te Waihoroi Shortland tera e mea ana, “Mō te rohe, mo te Taiwhenua o Te Peowhairangi, ka haukotia e mātou, ano hoki, neke atu 1000 o  Ngāti Hine kei te whakahē, ka whiua atu e mātou ki runga i tērā hunga, nā te mea ki te kore koe e whiu i te katoa, ka riro i ētahi atu e whakamana i ō hiahia.”

E ai a Mere Mangu, te māngai mō Te Pēowhairangi, “E kitekite ana ahau i ēna iwi, e whakahē ana ki ahau, i karangatia e au te hui i tērā taite rā, horekau he mea kotahi o rātou, kua āta karanga mai, ki te noho tahi ki te tēpū me au, ki te āta kōrero he aha te take kāhore rātou e pai ki ahau.” 

22 ngā mema o Tūhoronuku, 15 rātou he māngai mō ngā hapū o Te Whare Tapu o Ngāpuhi. Engari hei tā Mere Mangu, o Tekau i Mua hapū, o Ngāti Hine, kei te tēpū o Te Karauna kē a Tūhoronuku, ā, koia tonu te waka tika kia anga whakamua ai a Ngāpuhi Nui Tonu ki tētahi whakataunga. 

“Horekau he pai o te kōrero noa iho i te takiwa, me āta noho ki te tēpū, kia kite i ngā kai ka hora ki te tēpu, mena horekau koe kei te tēpu, ka rite ki te karakia rā, ko nga kongakonga anahe e taka ana.” te kī a Mere Mangu.

Heoi e kaha whakahē ana a Te Waihoroi Shortland, “Kahore ēnei tāngata e tika ana kia mātou, hei kawe i o mātou whakaaro, kua whai wāhi atu rātou ki te whakatau i ngā hiahia o Ngāti Hine, e kore a Ngāti Hine mō te whakaae ki tēnā.”

Ka tū a Ngāti Hine ki mua i te aroaro o te Rōpū Whakamana i Te Tiriti o Waitangi ā te wiki ko te heke mai, ka whakapuaki i ō rātou nawe kerēme tiriti i raro i te tirohanga mō Te Paparahi o Te Raki. Heoi ano, e koke whakamua ana a Tūhoronuku me te wawata kia whakatū he kaiwhakarite whakataunga tiriti mō Ngāpuhi hei hui ki te Karauna ā te marama e heke mai nei.