Nō te rā nei, ka timata te whakawā i a Rhys Ngahiwi Warren i te kōti teitei ki Kirikiriroa. E rua ngā whakapae kua ūhia ki runga i a ia mō te whakamātau ki te kōhuru, e toru mō te whakamahi pū ki ngā pirihimana, kotahi hoki te whakapae mō te tūkino tangata, kia whara kikino. E ahu mai ana ēnei whakapae i tētahi tutūnga riri mau pū, pā tata ki Kawerau i te Poutu te rangi o tau ka hori.
Hei tā mātou kaikawe kōrero a Mere McLean, ki mua i te kōti teitei ki Kirikiriroa i hora katoa ngā hāmene kua ūtaina ki runga i a Rhys Ngahiwi Warren, ko te mea nui kua tae mai tōna whānau mai Te Teko, mai Kawerau ki te tautoko i a ia, ko tōna tikanga e toru wiki te roa o tēnei kēhi.
Ka mutu, i timata te kēhi whakawā i a Rhys Ngahiwi Warren i runga i te uaua, ā, i hiki a Kaiwhakawā Brewer i te kēhi i mua i te toru karaka i tēnei ahiahi.
Na runga i ngā rārangi pūrongo hei arotakenga ma Warren i te mea koia tonu tōna māngai ki tēnei kēhi.
I te tuaiwa o Poutu te rangi o tērā tau, tū ai te tū mamao ā pū ki Ōtakiri, ā, e whakapae ana te Karauna i ēnei hara:
E rua ngā whakapae kua ūhia ki runga i a ia mō te whakamātau ki te kōhuru, e toru mō te whakamahi pū ki ngā pirihimana, kotahi hoki te whakapae mō te tūkino tangata, kia whara kikino.
Tokowhitu ngā wāhine, tokowha ngā tāne kei te kāhui whakawā.
Ka noho rātou ki te wānanga i ngā taunakitanga a Te Karauna i te wā i tū te tumamao ā pū ki Ōtakiri e whakapaetia i te mau pū a Warren, ā, ka pako nei tōna pū ki ngā pirihimana.
I te wā i kuhu mai a Warren ki roto i te whare kōti, mo tētahi wā poto noa iho.
Hei tā kaiwhakawā Brewer, i kawa mai ia whai muri i tōna kuhutanga mai, nō reira kua whakahoki atu ia ki muri.
I rere mai tōna whanau i Te Moana a Toi ki te tautoko i a ia. Tokotoru o rātou kua rāhuihia ake i te kōti āpōpō i runga i tā rātou kore e tū i te wā i wehe atu te kaiwhakawā i te whare i tēnei ahiahi.
Ka timata anō te kēhi hei te tekau karaka āpōpō.
