Kei ngā Kura Kaupapa Māori tō rātou ake marautanga motuhake

E toru tekau tau ngā Kura Kaupapa Māori e haere ana, ā, ināianei kei a rātou tō rātou ake marautanga motuhake.

Ka noho ko Te Marautanga o Te Aho Matua, i whakarewaina ki Kaitaia i te rā nei, hei whai mā ngā Kura Kaupapa Māori o te motu. I tae atu a Te Kāea ki te whakarewanga i Pukemiro.

Koni atu i te whitu tekau ngā Kura Kaupapa Māori e whakanui ana i te toru tekau tau o tā rātou kaupapa e haere ana .

Heoi, i tēnei hui a tau, tohua tuturutia tō rātou ake marautanga hou, arā Te Marautanga o Te Aho Matua.

E ai ki a Toni Waho, "Ko Te Marautanga o Te Aho Matua e mea ana anei rā ngā whakaakoranga, ngā akoranga e tika ana hei kawe mai mā Te Kura Kaupapa Māori katoa e hāngai ana ki Te Aho Matua."

He motuhake ngā tikanga o Te Aho Matua ki ngā kura kaupapa, e aro atu ana ki te ao Māori hei tuara mō ngā mahi whakaako.  Ka noho ko te marautanga hou hei marau matua, a ka whakatahahia ko Te Marautanga o Aotearoa.

Ki tā Waho, "Kia ū ki te āhuatanga o Te Aho Matua mā reira ka puta ai te wairua Māori, ngā tikanga Māori, ngā kaupapa Māori, ngā whakaakoranga Māori i roto i te reo Māori ērā e tika ana, mā te tamariki Māori i roto i ō mātou kura."

Engari ahakoa ngā whakawhiwhinga hou ki ngā Kura Kaupapa Māori, ehara i te mea kei te mutu ā rātou pakanga i reira.

Hei tā Cathy Dewes, "Kāre i te tika kia whaia e mātou otirā e tātou whanaketanga rumaki Māori, engari ko ngā hua o te ako kei hea te tautoko a te Kāwanatanga, kia hoahoatia, kia wānangatia, kia whakatauria i te kaupapa he aha hei tūkanga aromatawai e tika ana mō roto i ō tātou kura."

I raro i te tahua pūtea a te kāwanatanga rua mano mā tahi, ka tukuna te toru miriona tāra ki Te Rūnanga Nui mō te toru tau ki te whakawhanake i tōnā marautanga Aho Matua.

E ai ki Te Rūnanga Nui, ka whanaketia tonutia e rātou Te Marautanga Aho Matua nei.

Ki tā Dewes, "He tino pōhara tonu te Kura Kaupapa Māori Aho Matua, nā reira he mahi nui i roto i te toru tekau tau kei te heke mai, ko te whakariterite, ko te whakatikatika i te āhua o roto i ngā Kura Kaupapa Māori."