Kei ngā rangi te oranga tonutanga o Ipurangi-MANA e ai ki ngā tatau pōti

Kei ngā rangi te oranga tonutanga o Ipurangi-MANA e ai ki ngā tatau pōti a Whakaata Māori e mea ana he kotahi ōrau anake te wehenga i waenga i a Hone Harawira me Kelvin Davis i te rohe pōti o Te Tai Tokerau.

E ai ki ngā tatau, matua ra ngā pōti a-pāti, he toru tekau mā iwa ōrau te tautoko mā Reipa

He rua tekau mā rima ōrau mā Ipurangi-MANA.  Katahi ko Nāhinara, tekau ōrau.  Pāti Māori me ngā Kākāriki e iwa ōrau.  Aotearoa Tuatahi, waru ōrau.

Ki nga whika kaitono, ko Hone Harawira, he toru tekau mā waru ōrau.  Kelvin Davis, toru tekau mā whitu.

Te Hira Paenga, e iwa ōrau. Clinton Dearlove, kotahi ōrau.  Ā, mō te hunga kāore i te mōhio. he iwa ōrau.

Ka mutu, ko te hunga kaore mō te pōti, kāore rānei mō te tautoko i tētahi o aua kaitono he rima ōrau.

Kāti, e ai anō ki wa mātou tatau he tokomaha tonu ngā kaipōti i Te Tai Tokerau e rangirua ana ki te mahi tahi a MANA me te Pāti Ipurangi.

I roto i te uiui pōti a Whakaata Māori i tukuna te pātai, āe rānei e whakaae ana koe i te hononga o Ipurangi-MANA?

E tekau mā rua ira waru ōrau e mea ana kāore i te mōhio.  Whā tekau mā whā ira ono ōrau e mea ana, āe, kei te whakaae.

Heoi, e whā tekau mā whā ira ono ōrau e mea ana kāore rātou i te whakaae ki taua hononga.

Ko Kaitaia te kāinga o Hone Harawira, engari āe rānei koia te kāinga o Ipurangi-MANA?

Āe mārika e tōtara wāhi rua ana ngā whakaaro.  E ai ki a Bella Nathan, ko ia tētahi i waeahia mō te uiui pōti a Whakaata Māori, hei tāna kei te rangirua tonu.

E mea ana a Bella Nathan, “E pai ana au te tautoko i a Hone engari horekau au e mōhio mēna ka tautoko i a Internet.”

Heoi, e mōhio ana ngā kaipōti o Kaitaia kei te raru to rātou ōhanga, he iti noa hoki ngā tūranga mahi.  Ka mutu karekau rātou i te kuare ki te take matua o tēnei hononga.

Me rapu tangata āwhina i a tātou horekau moni koia hoki te mea me rapu pūtea.

Āe mārika koia te hua, engari he aha te utu?  E ai ki a Kelvin Davis o Reipa, ko te hoko i te turu, ā, nā wai rā hei tāna kua heke te tautoko mā Hone Harawira.

He kotahi ōrau noa i waenga i a rāua e ai ki a mātou tatau pōti.  He whakatūpato nui ki te Pāti Ipurangi e manako ana i te wikitōria o Harawira kia uru ai ki te Whare Pāremata.

Āe mārika e noho kawa ana ngā whika a Whakaata Māori ki a Laila Harré, engari anō te reka o ngā tatau rare.

Hei te Rāhoroi kite ai pēna ka whai hua tēnā hononga a Hone Harawira, otira o MANA, pēna rānei ko ia tērā ka mate ki te utu i te nama whakamutunga.