Kei tawhiti a Tarawhiti

James Perry

I pakeke mai a Kazna Tarawhiti ki Amerika. Kua hoki mai ia ki Aotearoa me tana kapa Poirewa no te kāreti o Utah Valley.  

He kaitakaro poirewa ia mō te Whare Wānanga o Utah Valley ki Amerika. E haere te kapa nei ki Hāmoa mō ngā wiki ruarua, hēoi kua hoki mai ia ki tōna whenua taurikua ki Aotearoa, takaro ai ki te kapa wāhine o Aotearoa.

Nō Hāmoa te kaiako o ngā Wolverines. Kua roa ia e hāpai ana i tōna iwi whai muri atu i ngā huripari i haukerekeretia ai a Hāmoa, nā whai anō kua kawea e ia i tōna kapa ki reira, hei ringa hāpai anō.

I whānau mai a Tarawhiti i Tāmaki Makaurau, hēoi nō te māuiui o ōna karani-mātua hūnuku ai tōna whānau ki Amerika, ā mohoa noa nei. 

He uaua i te timatanga. he tamaiti tonu a Tarawhiti i taua wā. Hēoi, i whāngai tonu ia ki tōna ao Māori e tōna pāpā, e Wayne. Hei tā Tarawhiti, nā tērā i māmā ake tōna tipuranga, ā moroki nei.

Kāore anō a Tarawhiti kia whakatau he aha tana whainga a mātauranga nei, hēoi e kaingākau ana ia ki ngā mahi whakaako. 

He hiahia nōnā kia poipoi i ngā rangatahi kia puta i te haikura, ka mutu kia akiaki hoki i ngā tauira kia eke ki ngā taumata e hiahia nei.

Hāunga anō tērā, ko te tākaro ki te taumata ngaio tana pae tawhiti. Hēoi, hei tāna he uaua pea kia eke ki tērā taumata nā runga i tōna poto. Ka mutu mā te aha i te whaiwhai hāere i ngā moemoea. 

Hei te wiki nei whitirere atu a Tarawhiti me tāna kapa ki Hāmoa, hāpaitia i ngā iwi ō reira.