Kei te āwangawanga tonu ngā kaimahi o Te Puni Kōkiri

Kei te tatari tonu ngā kaimahi o Te Puni Kōkiri ki ngā whakatau mō ngā whakahoutanga ka pā ki tō rātou tari, kia mōhio ia he aha ko te huarahi hōu e whaia ana. 

Whakarauika mai ai ngā kaimahi puta noa i te motu ki Te Whanganui a Tara i te rā nei, ki te whakapuakitanga mai o ngā whakarite i tō rātou tumu whakarae.

He pānui, he kotahi whārangi te roa, e kōrero ana mō te huarahi hōu o Te Puni Kōkiri, engari anō te huarahi hōu mō ngā kaimahi, auare ake.

E ai ki ngā panonitanga i puta i te rā nei, ka whakarerekētia ngā mahi puta noa i ngā rohe, engari tāria te wā ka kite mēnā ka whakakorengia ētahi tūranga mahi.

I kōrero mātou o Te Kāea ki tētahi o ngā kaimahi i Waihopai, ā, ko tāna kī, ka noho pōuri rātou mēnā ka whakakorengia tō rātou tari i te mea he tokomaha ngā Māori i taua rohe rā, engari e mōhio ana ia ki ngā āhuatanga o te mahi whakahou, ā, ko te panaia kaimahi tētahi.

E ai ki te tumu whakarae a Michelle Hippolite, me kaua te Māori e māharahara nā te mea hei te mutunga o te rā, ko te whāinga matua kia whai hua te Māori.

Hei ngā wiki e ono ka mōhio ngā kaimahi o Te Puni Kōkiri ko hea rātou i te huarahi hōu nei, ā, he wā āmaimai pea mō ētahi e māharahara nei ki ngā tau kei tua.