Kei te harikoa ētahi mema pāremata o Reipa ki te kaha tautoko o ngā iwi Māori Pasifika

Hei tā te tauhōu o ngā mema paremata Pasifika o Reipa a Jenny Salesa, me whakapiki ake te tautoko ki a Reipa i ngā hāpori whānui katoa o te motu, kia angitū ai rātau hei ngā tau kei te heke mai.

He ono tekau ōrau o ngā pōti ā-pāti nā Salesa i kapo ake i tōna ake rohe pōti o Manukau ki te Rāwhiti.

Ko Su'a William Sio hoki tērā i toa mō Reipa i Māngere mō te wā tuatoru. Hei tāna, ahakoa kaore a Reipa i toa, kua papatū ake āna mema Māori, Pasifika hoki.

Kāore e roa ka rere atu a Jenny Salesa ki tōna tari hou i Paremata, kua oti te taha patipati pōti, me te mea nei i kaha taunakitia a aia e tōna rohe pōti i Manukau, hei āpōpō ka hui ngātahi rātau ko te Rūnanga Pāremata o Reipa, me te mea nei, kei a Salesa tētahi karere mā rātou.

E rere pērā ana hoki ngā whakaaro o te kāhika tōrangapū i te hāpori o Māngere, i pōtihia a Su'a William Sio anō hei mema pāremata mō rātau mō te wā tuatoru.

E rua, e rua, e whakapono ana ēnei kākāwahanui Pasifika o te ao tōrangapū, kei roto tonu i ngā ringaringa o te ope Pasifika, Māori hoki i hoe kaha i te karere o Reipa i tēnei kōwhiringa, te whakautu mō tua anō hoki.

Nō reira ahakoa te nui o te hinganga a Reipa i te kōwhiringa whānui, arā te māpu Pasifika ngātahi me ngā Māori e ngunguru nei i roto i te whai, kia hoki kaha mai a te tau 2017.