Kei te ihu tū tonu te Pirimia ki ngā whakapae i te pukapuka ‘Dirty Politics’

E ihu tū tonu ana te Pirimia a John Key ki ngā whakapae i te pukapuka, Dirty Politics, he mea tuhi e te kairipoata whakatewhatewha, e Nicky Hager. I ahu mai ngā whakapae i ngā pārongo manomano pēnei i ētahi īmēra, e whakaatu ana i te wairua whakaparahako o ētahi kaimahi a te Pirimia, o ētahi Minita, o ētahi kaitautoko hoki o Nāhinara.

I a John Key e whakapuaki ana i tētahi kaupapa whakamahara ki te pakanga tuatahi o te ao, he pakanga ano tōna mo ngā whakapae kei te pukapuka Dirty Politics. Engari tē tatū atu ki te mura o te ahi, e kore a John Key mo te aro ki ngā whakapae.

Ae marika ahakoa ngā whakapae mōrikarika mo John Key me ētahi o ana kaimahi, tae rawa hoki ki ētahi o ana Minita, te aro i a ia. Engari kua huri kē te aro o te Pirimia ki te tātā i te kaituhi, i a Nicky Hager.

Ko Hone Harawira tētahi kei roto i te pukapuka, i te kaituhi o te wharangi ipurangi nei a Whale Oil, ara a Cameron Slater, e kōrero ana mo ētahi whakamahuki kei a ia e kite ai te turakitanga o tā Hone Harawira me Kim Dotcom whaiwhai pōti.

E ai ki a Hone Harawira o te Pāti Ipurangi Mana, “E tarai ana ia te whakakahore te mana o te pukapuka, engari kua hokona te katoa o te motu ki tena pukapuka i te mea kei te mohio rātou ehara tena tangata e kōrero teka ana.”

Kāti, e kore e kahore ko te manako o John Key mā ka moe tēnei take ina nga rangi whakatā kei te haere. Heoi, tūtūru e kore te pakanga mo te tau pōti e tau ki kona.