Kei te kimi a Te Kāhui Rangatahi i ngā huarahi kōrero mā ngā reanga Kaumātua, me ngā taiohi Māori

He hunga matakaikutu e whakatinana ana i ngā tongikura a Rūruhi, a Koroheke mā. I te rā nei i whakaeke te Kāhui  Rangatahi ki runga i te marae o Te Awamārahi mō te Poukai, ki te whakawhiti kōrero, ki te whakawhiti whakaaro mō ngā tini kaupapa o te Kingitanga.

Anō te pai, te ahua reka, te noho a ngā teina me ngā tuakana. Kei te kimi a Te Kāhui Rangatahi i ngā huarahi kōrero mā ngā reanga Kaumātua, me ngā taiohi Māori.

E ai ki a Whati Ratu, “He whakakaha ake i ngā kōrerotanga a te teina ki te tuakana me kī, ko tātou ngā rangatahi e whai nei i ngō tātou kaumātua i runga i ngā hui whēnei nā.`”

Neke atu i te tekau-mā-rua Poukai kua taea atu e te tira nei, kia āhei te noho tahi me ngā tini iwikainga o ngā marae, he wānanga mo ngā korero hītori o te Kingitanga, e ai kia Ratu, me whakareri mo āpōpō, aianei tonu.

Ki tā Ratu, “Ko te hua e whai nei e mātou, kia kaha ake ngā mōhiotanga mō mātou, kia whai ake i ngā tapuwae kua mahue ake nei e rātou, rātou e ora tonu nei, i runga anō i te whakāro ko mātou anō e kawe ake nei i ngēnei kaupapa a haere ake nei.”

Kua titiro te rōpu nei ki ngā momo āhuatanga o te kōrero, mai i ngā pukapuka, ki ngā pikitia kōrero.

Hei tā mema Kirimaku Kihi, ko tōtahi āwangawanga ko te whakahoki mai i ngā rangatahi ki ngā marae.

Hei tā Kirimaku Kihi, “Ko tā maua ko Lee mahi ko te haere ki ngā Poukai, te whakaatu i tēnei tumomo āhuatanga toi, o te rangatahi, o tērā hunga e rata ana ki ēnei mahi hoki.”

Ko tētahi whainga nui mā Te Kāhui Rangatahi, ko te whakarenarena i te taukāea whanaungatanga o ngā uri, mai i ngā kōhanga puta ake ki ngā pūkorero i te paepae.

E ai ki a Te Kāhui Rangatahi, “Ko ōku mahi ko te haria mai i ngā kōhanga reo ki te ako i ngā tongikura i te Poukai.”

E rua tau te rōpu e mahi tuao ana, hei te otinga mai o ngā mahi ko te tuku atu i ngā taonga ki a rātou e tiaki nei i Te Kāhui Rangatahi.