Kei te ngākau titikaha tonu te mema Māori o Te Tai Tokerau a Hone Harawira ahakoa te huringa o te tautoko a ngāi tōrangapū kē ki muri i tōna hoa whakataetae, arā, ki a Kelvin Davis i tēnei wiki.
I te rā nei, i aru atu a Te Kāea i ā rāua mahi whakamutunga ki te whakararata kaipōti.
I te rā e whakahinga ai ngā pānui tōrangapū te whainga he kotahi tonu te whāinga kei te aroaro o Hone Harawira.
E ai ki a Hone Harawira, “He mihi atu ki a koutou katoa e te whānau, ahakoa e tuku pōti ana ki a wai, tuku pōti atu ki te tangata ko tōna tino kaupapa ko ngā tamariki. Ehara i te mea kia whai pūtea kia aha rānei engari kia whāngai i wā tātou tamariki.”
Kei runga noa a Kelvin Davis e haere ana i ngā tautoko mai i te Pirimia tonu a John Key tae atu ki a Winitana me te Pāti Māori anō hoki.
E ai ki a Kelvin Davis, “E tautoko ana ētahi atu tangata i ahau, e meatia ana ki Te Tai Tokerau kia pōti mai rātou i runga i te whakaaro, he tangata pai a Kelvin, he tangata tika ia, he tangata kaha, he tangata e hiahia ana kia whakapiki ake Te Tai Tokerau. Nā reira i runga i ēnā whakaaro, e harikoa ana au kia whiwhi te tautoko aua rangatira.”
Koinei te tuatoru o ngā kōwhiringa pōti ā-motu mā Kelvin Davis e whakataetae ana ki a Hone Harawira, ā, kahore anō te kaiārahi o te rōpū MANA kia hinga noa i te mīhini o Reipa.
Engari āpōpō kite ai te motu mehemea ka ea te wawata mai rā anō a te uri o Ngāti Manu kia riro i a ia te tūru Māori o tēnei rohe.
