E whakarite ana te karapu Waka Ama hōu o Whanganui arā ko 'Ngā Kaihoe o Ratana' mō ngā whakataetae Waka Ama ā motu hei te wiki e kainamu mai nei.
Ko te hoe whakamutunga whai muri i te wehenga ki Roto Karapiro, Ratana ki te hoe! I timata te karapu nei i te rua tekau ma wha o Haratua i tēra tau, ā he ranunga ōna kaihoe. E rua tekau ma wha ngā mema kaihoe o te karapu hēoi kaare kau ōna rauemi taputapu rānei engari ka whai āwhina rātou i ētahi atu karapu. Kei te kōtihi o te whakataetae ngā whakāro o ēnei kaihoe."
He ai ki te heamana o te karapu o Ngā Kaihoe o Ratana a Tahi Nepia, "Tuatahi, ko te tino kaupapa o to mātou nei karapu, kei te whai mātou i te mātauranga i te tuatahi, tuarua te whakakotahi ai i te whānau, tuatoru ko te hauora, He nui ngā mahi o tō mātou nei karapu ko tētahi atu hei whāngai i a mātou nei tamariki. I whakāro atu mātou me haere mātou ki Karapiro, i reira whakanuia atu a mātou tamariki."
Ko tā Manaia Meihana, tētahi kaihoe o te tīma Waka Ama tekau ma ono te pakeke, "He āhuatanga nui whakaharahara tēnei mō mātou i te mea he tuatahitanga mā Ratana ki tēnei whakataetae."
Ko tā tētahi o ngā kaiako o te tīma Waka Ama mō ngā tama takawaenga a Maria Paul, "Ko te paetawhiti mō to mātou kapa ā kia eke ki ngā taumata o te whakataetae mēna ka oti i a mātou tēra hiahia ka pai, mō te taha ki te karapu ko te tū mārohirohi hei kanohi mō te Pa o Ratana, te māramatanga me ōna mātāpono, koira te putake o tēnei karapu."
Anei hoki ngā kōrero a te kaiako o te tīma Waka Ama mō ngā kōtiro takawaenga a Karangi Hamahona, "He nui ngā piki me ngā heke, kua whakawhanaunga tātou ki a tātou kia pai ai ngā hononga ki waenga i a tātou anō, hēoi e toru toru noa iho ngā ra e toi ana ā kua rarau pai te wairua o ngā kaihoe.
