Kei te whakarite te kōmiti hōu o Te Tii Marae ki te whakanui i te rā o Waitangi

E rua wiki noa iho kua pahure nō te tīmatanga mai o te kōmiti hōu ki te marae o Te Tii, Waitangi.  Nā reira he poto te wā, he nui ngā mahi kia rite ai mō te rā o Waitangi e kainamu ana. I te rā nei, i kōrero mai tō rātou heamana hōu ki a Te Kāea.

Ko ngā mahi hei manāki i te tini me te mano kei runga ake i ngā whakaaro o te haukainga ki  Waitangi.

E ai ki te Heamana o Te Tii marae, a Emma Gibbs, “Te mea nui hoki ko ngā kaimahi ki konei ko ngā uri o ngā tūpuna i hainatia tēnā tiriti me tēnā whakaputanga.  He tino nui tēnā mana ki ngā kaimahi o tēnei marae.”

Nō ngā rā tata nei anō ka tohua e te Kōti Whenua Māori he kōmiti hou mō Te Tii Waitangi Marae. Nāreira he poto te wā, he nui ngā mahi.

E ai ki a Gibbs, “I roto i tēnei tarahititanga, e rua pea ngā wiki i whakahou atu mātou i roto i tēnei tūnga, engari kua oti haere ngā mahi. Horekau he kōrero, he aroha noa iho nō ngā uri katoa.”

Kua eke ki te kotahi rau whitu tekau mā rima o ngā tau nō te hainatanga o Te Tiriti o Waitangi.  Kei te ākina te motu e ngā uri o Ngāti Kawa me Ngāti Rahiri i roto i ngā kaupapa katoa ka kawea mai e te iwi ki runga i tēnei marae a ngā rā e tū mai nei.

Ko tā Gibbs, “Me mutu tātou te paopao kia tātou anō, me kotahi ia mātou me haere tātou he ope kotahi ki mua i te kāwanatanga.  Ainei pea me timata ai i tēnei rā.”

Ā, te ahiahi nei ka pōwhiri ngātahitia ko ngā kāwana a rohe ngā pirihimana ngā wātene Māori mātou o te hunga pāpāho, me ngā rōpu katoa ka mahi ki runga i tēnei marae a ngā rā e haere mai nei. 

A te ata āpōpō, ko te kawenga mai o ngā mate me te taenga mai o te Kāwana-Tianara a Jerry Mateparae.