Kei waho te Kāwanatanga e tū ana i Waitangi inā ka hainatia te TPPA?

Kaua rā e ohorere e te kāwanatanga ki te kore ia e whakatauria ki Waitangi mēnā ka te waitohu a Aotearoa i te TPPA. Koinei tā te mema pāremata Māori o Te Taitokerau a Kelvin Davis i te putanga mai o tēnei whakatūpato i te māngai kōrero o Te Tii Waitangi Marae, i a Kingi Taurua.

E ai ki a Kelvin Davis he take whiriwhiri ma te iwi, me pōhiri i te Pirimia a John Key me tana ope ki runga o Te Tii Waitangi i tēnei tau, kahore rānei.

Hei tāna, "Ki taku whakaaro nā te kore o te mahi pono a te Kāwanatanga e pēnei ana ngā whakaaro o Kīngi mā.  Kīhai te Karauna i āta kōrerohia, i āta wānangahia te TPPA ki a Ngāi Māori mā.  Kua noho mātou ki roto i te pōuri, kua whāngaihia ki te tūtae kau, te tūtae pūru, horekau i te mōhio he aha kei roto i taua kirimana."

E whakapae ana a Kingi Taurua inā mana te TPPA ka takatakahi i ngā kawenata tapu i tāmokohia e ngā ariki o te ao Māori ki Waitangi.

Hei tāna, "Ki ngā kōrero ngā tau kei te tū mai kura tito mā ngā kamupene nunui e whakahere i tō tātou motu.  Koia kē tērā ko tōku āwangawanga.  Inā riro mā rātou kura riro te mana o te Tiriti o Waitangi, kua riro te mana o Te Whakaputanga.  Koia ērā ko aku nei kawenata e tino mataku ana au kei riro, kei takahia ka ngaro pēnei i te moa.

E mea ana etahi ko te marae atea o Te Tii Waitangi marae te wahi tika e hora ai nga take torangapu ki te aroaro o te kawanatanga. Ko te mate kee hei ta Kingi, hei te tuawha o Pepuere haintia ai e te kawanatanga te kirimana TPPA.

Hei tā Taurua, "Mutu ake ka haere mai ki Waitangi a te rima o Pepuere, he aha te take i haere mai ai koia tērā ko te pātai i haere mai rātou ki te aha, ki te ruirui i te tote ki runga i ngā whara kua pā ki runga o Ngāpuhi, koia tērā pea ko te take horekau he whakaae ana kia haere pērā mai rātou ki roto o Waitangi.  Koia au e mea nei me titiro whānui a Ngāpuhi ki tēnei take."

Hei tā Davis, "Tāku atu ki te Kāwanatanga, kaua rātou e ohorere ki tēnei tū ngā Kingi Taurua, kōrero ki a Ngāi Tātou kia mōhio tātou ngā mea kei roto, ngā piki ngā heke ngā pai ngā hua me ngā mea kikino."