Kia māmā te utu mo te kūmara ki ngā whānau

I tipu te māharahara o Te Rangikaheke Kiripatea i te wā i piki te utu mo te kūmara mai i te whā ira tekau mā rua tāra mo te kirokaramu ki te waru ira iwa tekau mā iwa tāra. Ko tana hiahia he whakatū i tētahi pēke kūmara kia māmā ake te utu mo ngā whānau ki Rotorua.

Kei a Puhi Mitchell te tūranga nui hei whakaatu ki ēnei tauira me pēhea te hauhake i te kūmara. Ko tāna, ko te whakatipu i ō ake kai te huarahi hei haukoti i ngā utu nui mo te hoko kai. “Tūmeke, te pikitanga o te utu, kāua e aro ake, me whakatipu i ō kai, ā, kia pēke mo tētahi wā roa” koinei tā Mitchell.

Tekau mā wha ngā momo kūmara kei te hauhakehia e tēnei minenga, he tauira tēnei kaupapa ki raro i a Kai Rotorua, he rōpū hapori e whakatairanga ana i ngā māra kai.

Ki tā Te Ariki Morehu, Kōeke nō Te Arawa “mehemea tātau ka titiro iho ki te kai ōnaianei kāore mōhiotia e tātau i haere mai i hea! Kāti tēna ko te utu”. E ai ki a Tatauranga Aotearoa kua piki te utu mo te kūmara mā te waru tekau mā toru paihēneti, na whai anō te whakahau a Te Rangikaheke Kiripatea kia whakatu i tēnei kaupapa, tuatahi hei titiro ki ngā ahuatanga o te whakatipu i te kūmara, tuarua ki te whakamāmā i te utu.

“He tauira tēnei mo tērā tau ka titiro anō mātou ki te tuku i ēnei kūmara, engari mo tēnei wā ka noho ēnei kūmara ki raro i a Kai Rotorua”. Ko tā Kai Rotorua e manako nei kia haere tonu tēnei kaupapa whakatipu kūmara engari kia whakawhānuihia mo tērā tau.