Kia matāra ngā Kamupene o te motu mō ngā mahi tāhae pūtea mā runga ipurangi

updated

Ko tētahi mahi nanaki ki Te Wānanga o Aotearoa te take e piki ake ana te āwangawanga mō ngā mahi tinihanga pūtea i te ipurangi.

E ai ki a Hinemaua Rikirangi, Pou Māori o Te Pēke o Aotearoa “Ko te raru kē, he uaua, he uaua ki te mōhio ko wai te mea pono, he aha te mea pono, ka tae mai ngā pānui ā imera, ā aha rānei. I ēnei rā kaore i te tino mōhio he aha te mea pono, ko tērā te raru.“

Nā te Tumu Tahua, nā Bronwyn Korohere te pūtea whitu tekau mā iwa mano tārā amerikana i tuku ki tētahi pēke ki tarawāhi whai muri i te whakaaetanga a īmera meho nā te Taiurungi o Te Wānanga o Aotearoa, nā Tākuta Jim Mather.

Hei tā Chris Hails nō Netsafe, Ko te ‘Business Email Compromise’ te ‘Whaling’ rānei, ka aro ki ngā rangatira o ngā kamupene, me te mahi tinihanga kit e tuku pūtea atu ki a rātou pēke ki Aotearoa, ki tarawāhi rānei.

I ngā marama e toru kua taha ake, e toru tekau mā rua ngā amuamu mō te 'whaling' kua tae ki a NetSafe, i te marama o Whiringa ā rangi, e rua rau, e toru tekau mā whā mano tāra te nui o te pūtea i tāhae mai i ngā kamupene e ono.

E ai ki tētahi o ngā Pou Māori o Te Pēke o Aotearoa, ki a Hinemaua Rikirangi, kei te koi haere nga tangata tāhae pūtea.

“I ngā rā o mua i runga i te ipurangi he uaua, engari ināianei he ngawari ki te kimi kōrero, ki te tāhae whakaahua.”

Ko tā te Taiurungi o Te Wānanga o Aotearoa, a Tākuta Jim Mather kei ngā ringaringa o ngā pirihimana o Hong Kong me Aotearoa tō rātou take ināianei.