He MP o Reipa kua āpitihia atu ki te rārangi roa o ngā ingoa o ngā kaitono ka tū pea mā Te Pāti Māori. Nā ētahi māngai nō roto mai i Te Pāti Māori te kōrero ki Te Ao Māori, ko te MP o Ikaroa Rāwhiti, ko Meka Whaitiri tētahi e hiahiatia ana e te rōpū mō te kōwhiringa pōti e haere ake nei.
E ai ki ngā whakamārama, kua kīa ki a Whaitiri ka kore ia e tohua hei Minita ki te kōwhiria anō a Reipa hei Kāwanatanga. I tangohia atu ngā kōpaki Minita i a Whaitiri whai muri i ngā whakapae nō roto mai i tōna tari mō te mahi whakatumatuma a te mema pāremata. Nō te tau 2013, kua noho atu a Whaitiri hei mema o Ikaroa Rāwhiti, i tana ekenga panuku noa atu i a Marama Fox, te kaiārahi takirua o Te Pāti Māori, i te tau 2017.
Ko te hiahia o Whaitiri kia whiti atu ki Te Pāti Māori, kaare e mōhiotia ana.
Ka whai tēnei i te putanga kōrero mō ētahi ingoa rongonui e whai hononga ana ki Te Pāti Māori. Ko te Minita o mua o Reipa, ko John Tamihere, ko te kaitono o mua o Reipa, ko Rawiri Waititi, ko te kaikaunihera hoki i Rotorua, ko Merepeka Raukawa-Tait ētahi o ngā ingoa e kōhimihimutia ana hei kaitono mā Te Pāti Māori.
