Ko ngā kerēme, ngā kōawaawa me ngā hononga ā-iwi, ngā kaupapa matua o te kauhau a te Kingi

He maha ngā take nui ki a Ngāi Māori te whakaara ake i a Kīngi Tuheitia i tāna kauhau ā-tau i te hui whakanui i tōna Koroneihana tuaiwa i tēnei rā.  Ko te Pirimia, ko John Key i tatū i runga i te reo pōhiri a te Kīngi.

Ahakoa ngā kōrero mō te hauora o te Kīngi, puta ora mai ana pēnei i te putanga ora mai o Tamanui Te Rā, ā, me te wairua hātakēhi i rongohia i ētahi taima, ā, ko tā Te Kīngi Māori, tā Tuheitia.  

Ā, i hāngai ngā take nui ki a ia.  Ko tētahi o ngā take i puta i te kauhau ki ngā iwi o te motu i whakaeke ki Tūrangawaewae ko ngā kerēme a te Kīngitanga ki roto o Tāmaki Makaurau.

Ko te mana ki te wai, pēnei i ngā wai o Waikato e hono nei i ngā iwi maha, tētahi o ngā aronga matua a te Kīngi Māori.

I te Pirimia e noho ana ki te taumata tapu o Te Kāhui Ariki, ko te āki a te Kīngi ki tōna iwi ake o Waikato, me te iwi o Ngāi Tahu kia hāpai ake i te hunga kāhore anō pea kia tatu i tētahi whakataunga me te Karauna.

Hei tā Jeremy Tātere, "Ko tāna kī mai ki a mātou, kei konei a Waikato-Tainui hei āwhina i ngā whai nei kia tutuki i wā rātou nei kerēme nō reira ka nui taku whakamihi atu ki te Kīngi."

Matua ra, ko te mana o te Kīngitanga me te wawata kia whakaea i ngā pātai e hāngai ana ki te Tino Rangatiratanga.

E ai ki ā Rahui Papa, "Kāhore anō i tatū noa nō reira e whakatakoto atu ana ki runga i te tēpu kōrero, ki runga i te tēpu whiriwhiri hei matapaki mā te Kīngitanga, mā Waikato me te Karauna."

Ā, ko te tira tautoko i ngā manuhiri tūārangi o te Kāhui Ariki o Tonga, a Piriniha Pilolevu Tuita i whakakapi i te Kauhau a te Kīngi.

He takapau wharanui e tohua ai te ū a te Kīngitanga ki te tuitui i ngā tātai hono i kāinga, tatū atu ki tāwāhi.