Ko ngā pākete kai nō ngā toa paku te take e mōmona haere ana ētahi tamariki

E mea ana Te Ratonga Hauora ā-Iwi o Tāmaki Makaurau, ko ngā toa paku tonu te take e mōmona ana ngā iwi o Aotearoa, nā te hoko i ngā kai hukahuka ki te hunga tamariki.

Ā, kua whanake ake tētahi kaupapa e panonihia ai Te Ture mō te Whakahaere Rawa, i raro i tōna nei maru tukuna ai te mana tohu ki ngā mema kaunihera, ko ēhea toa paku hōu me whakatū, me kore rānei e whakatū.

Engari, mā wai e tohu he aha te hoko a ngā tamariki?

He iti te utu, he ngāwari te hoko, ā, ko ia anake pea te whiringa mā ētahi tauira.

E ai ki a Hoera Farrell-Moehurori, “He maha ngā whānau Māori ngā tamariki Māori ka hoko kai kāore pai mō te tinana, ka momona haere, mangere hoki.”

Engari e hiahia ana Te Ratonga Hauora ā-Iwi o Tāmaki Makaurau i te mana whakatau he aha ka hokona ki ngā tamariki.

He rua tara noaiho te utu mo tetahi pākete kai pēnei, he inu ki roto, he tipi, he pihikete hoki. Ā, ki konei ki Glen Innes ki tētahi whare huawhenua he rua tāra mō tētahi panana, tētahi āporo me tētahi pea. Ā, ko te pātai ia ka whiri ngā tamariki i te hea?

He kura, he toa paku, he kura, he toa paku, ā, koia te āhua ki tua o te huarahi o Te Kura Kaupapa Māori o Puau Te Moananui A Kiwa.

Hei tā tētahi kaiako, a Lynley Pekepainga, “Mōku ake hei aha te kimikimi haere nō wai te hē engari me huri te ihu o te waka he aha te oranga.”

Ahakoa kua kaha piki te mōmonatanga huri noa i te motu nō ngā tau whitu tekau, e manako ana Te Ratonga Hauora ā-iwi o Tamaki ka panonitia tēnā a ngā tau e rima kei te haere.