Ko ngā rangatahi te iho matua i te hui ā motu a Te Kāhui Rangatira ā Iwi

James Perry

Ko Te Ātiawa o Te Waka a Māui kei te manaaki i ngā māngai 150 nō ngā iwi e 70 o te motu i te hui ā motu a Te Kāhui Rangatira ā Iwi ki Waitohi.

Nō te ata nei, ka pōhiritia ngā māngai ki Waikawa Marae, ā ko ngā hua o te Hui Rangatahi ā Motu i tū inanahi, i whakatakotoria hei tīmata i te hui. 

Nā Ngāti Kahungunu te hui nei i whakatū ki Heretaunga tata ki te rua marama ki muri.

Ko te whakahaere i ngā wai Māori, te whakaemi me te tuari i ngā raraunga kōrero Māori, ko ngā māharahara mō te tuku i ngā pūtea a Whānau Ora, ko te āhuārangi, ko ngā pānga hoki o ngā tikanga a Te Manatū Ahu Matua mō te Mīere Mānuka e whakapaetia ana ka wherawherahia tonutia, ā ka whakatakotohia ki ngā māngai o te Karauna hei te Rāmere.  

Ko te matapae, ko te Minita Whanaketanga Māori, ko Nanaia Mahuta ka tae atu ki te hui hei te ata Rāmere, ā ka whārikitia ngā kitenga ki mua i a ia.

Te āhua nei, ko ngā take ki waenga i Te Kāhui Rangatira ā Iwi me Nanaia Mahuta hei Minita i muri i te kōwhiringa pōti, i ea whai muri i te hui i te Hereturikōkā, i te rerenga o ngā mihi ki te Minita i āna mahi whakapūmau i te reo a ngā iwi, hei reo rangona.  

Ko Kahurangi Naida Glavish, ko Tā Mark Solomon, ko Ahorangi Makere Mutu, ko Mike Smith, ko Linda Tumahai, ko Dion Tuuta, ko Haami Piripi, ko Ngāhiwi Tomoana, ko Rāhui Papa ētahi o ngā māngai i te hui e whakapaetia ana, ka whakaputa kōrero mō ngā take i puta i te Heretrurikōkā.