Ko Ngāti Toa i wikitoria ai te wāhanga tāne ki te tōnamana Poitūkohu Māori ā-motu

Wikitōria Day

Inā te rawe o te tīmatanga a Waikato-Tainui.  He kapa kei raro kē i te tekau mā iwa pakeke, engari i whakapikihia rātau ki te wāhanga tāne, he tokoiti nō ngā kapa tamatāne.

Heoi ko Ngāti Toa, te tira i oti tuarua mai i tērā tau, tērā i ngana ki te whakakore atu i ngā hapa o tērā tau. 

I te mutunga o te hauwhā tuatahi, i mua tō rātau ihu mā te tekau mā rua piro.  I pakanga ngā rangatahi o Waikato-Tainui mō te hemo tonu atu, ā, tērā ētahi wā i tino pīataata mai rātau.

Engari kei runga noa atu ngā pūkenga o ngā tāne o te kapa whero.

He toru tekau mā ono ki te rima tekau mā rua ngā tatauranga i te wehengarua.

Ko Ngāti Toa a runga i te wāhanga tuarua o te kēmu.  Nā ā rātau mahi ohu i tutuki ai i a rātau ngā pironga.

I ngana a Waikato-Tainui kia ārai i tō rātau hoariri, engari whai hua anō a Ngāti Toa.  Nā konā ka eke ngā tatau ki te toru tekau mā iwa ki te ono tekau mā toru i te hauwhā tuatoru.

I kaha ngā kapa e rua tae noa ki te mutunga, heoi, ko te kapa nō Te Whanganui-a-Tara tērā i wikitōria i te mutunga iho.  He ono tekau mā whā ki te iwa tekau mā iwa.