Ko tā Nāhinara ka āhei ngā iwi Māori te tuku penihana rangatahi ki āna uri

Kua puta i a Nāhinara te whakahau, ka taea e ngā iwi o te motu te pēnihana rangatahi te tuku ki āna uri, he whakaaro ohorere tēnei ki ētahi i te taha āpitihana, heoi mō ētahi atu anō he mea hei whakakaha i te tino rangatiratanga o ngā iwi huri noa. 

Ko te pēnihana rangatahi, tētahi momo pēnihana e whakapaetia ana a Nāhinara ka tukuna mā ngā iwi e toha ki a rātau ake uri, me te mea nei ka taea tona whakatīnanatanga ki waenga tonu i te tau e heke mai nei.

Me te mea nei, e taunakitia ana te whakaaro nei e te kaiārahi o Reipa anō hoki.

Heoi, e whakakahoretia mārikatia ana e Metiria Turei, kaiārahi o ngā Kākāriki i te whakahau, hei tāna he mea karo noaiho, he tūmatawhāiti i tētahi kawenga e kore e tikāna kia tūmatawhāitihia.

Me te mea nei, koia pū tā tētahi māngai ā iwi, a Haami Piripi o Te Rarawa.

Heoi he rangi anō tērā o te kaitono o Tāmaki Makaurau mō Reipa ki tērā o tana kaiārahi, ko Peeni Henare tētahi i mahi mo te Tari Whakahiato Ora i ngā tau, ko tāna e whakapono nei, e kore rawa e taea i roto i te wā e matapaetia ana. 

Mō te taha ki ngā ratonga taunaki rangatahi, e ai ki te Minita a Paula Bennett, mā tēnā, mā tēnā iwi anō a rātau kaupapa tuku e whakahaere, ki tō te kaute tangata o ia iwi.