Ko tā ngā uri o Porotī he aromatawai i tōnā puna wai

E mea ana ngā mana whenua a Te Uriroroi, Te Parawhau me Te Mahurehure ki Whatitiri kāhore e tika ana te whakamahinga o ngā wai o Porotī. Tēnei rā, hoki atu ngā uri ki tō rātou puna wai ki reira aromatawai anō te huarahi anga whakamua whai muri i te tono kia hanga kamupene pātara wai ki ngā whenua e pātata ana. 

Hei tā Millan Ruka, tētahi kaikōrero mō ngā hapū o Porotī, ko tēnei tonu te takitū whakahē mutunga ki ngā tono ngōngō i ngā wai o te puna nei. 

"He whatinga ture tēnei te hoatu noa iho nei i ngā rawa. Toru tāra te wariu o te pātara kotahi rita, ēngari he kotahi tāra rua hēneti te wariu o te penehīni. Nā reira, ko te wariu o te wā he mea whakarau i te penehīni mā te toru, ā, kaua rā anō e hoatu mō te kore utu."

Tēnei rā tohungia ai te porotū hou a ngā uri kua hoki mai ki te whakapai i ngā whenua me te whakarite rautaki hou mō tēnei puna wai ō rātou.

"I tērā wiki, ka puta te whakatau a Te Kaunihera ā-rohe o Whangārei kua kore e aro mai ki te mahi tahi me mātou. Ā, tōnā tikanga ka pēra, ēngari ko mātou anahe ināianei e anga whakamua ana me tō mātou kotahi. Nā, ka tirohia tētahi wāhi e āhei ai tētahi mahinga wai anō mō mātou ake."

E whai atu ana tēnei i te tono hou kia hanga kamupene pātara wai he kotahi rau mita te tawhiti atu i konei, ā, e whai atu ana anō hoki i ngā whakahē ki ngā tono tango wai e whā i roto i te tau.

"Ka tohatoha i te rawa nei, mai rā anō mātou e pērā ana. Ēngari ko te raru kē, kua toru tekau tau kē mātou e mahi pērā ana ēngari kāhore hoki ērā atu i te hiahia tohatoha wai ki a mātou anō. Me te mea nei, kua tukuna ō mātou wai kia rere tika atu, ā, ka kore hoki e tahae ka pērā te tohatoha mō ake tonu atu."

Hei āpōpō, hei te takiwa o te tekau karaka ka taki haere atu ngā uri o tēnei puna o Te Waipao me te takahi i ngā tiriti o Whangārei ki reira hari tonu ai anō tēnei kaupapa, porotēhi ō rātou.