Ki te maha o ngā whānau Māori, ko te kohi kaimoana hei hora ki ngā hākari mō te kirihimete, he mea nui. Engari ko te whakatūpato a Te Manatū Ahu Matua, me noho te nui o ngā kai moana ki te rahi e whakaaetia ana i raro i te ture.
Mō tētehi kaihaoika, kairuku moana hoki mō Steve Ranapia (Ngāti Awa, Tainui waka) me ngā whānau maha, ehara i te hākari ki te kore ngā kaimoana.
“Te mea nui te kohikohi kaimoana mā te tēpu, āe,” i kī atu a ia. “Mēnā ka haere mai he manuhiri, he mea nui tērā mā rātou te kite ngā kaimoana i te tēpū kirihimete.”
I raro i ngā ture o te Manatū Ahu Matua he tatau kaute mō te kohi kaimoana. Ki Tāmaki Makaurau e rima tekau ngā kina e rua tekau ngā tipa mā ia tangata.
Engari i tēnei wā o te tau ko te nuinga o ngā whiu mō te kohi kaimoana he iti ake i tā te ture i tohu ai. Waihoki e whia rau tāra ka whiua ki te kaihara.
“Mehemea he kaupapa nui kei mua i a koe pērā i te tangihanga, he poto te wā ki te kohikohi i ngā kūtai, kina rānei, ko te aha,” i mea atu a Ranapia.
“Ki te kore e mōhio tētahi e tuhituhi ngā permits kohi kaimoana maha, he raru tērā.”
I mea mai te Manatū Ahu Matua ki a mātou o Te Kāea kei te katoa te haepapa kia toitū ngā kaimoana. Ka mutu me whai tātou katoa i ngā ture.
Nō reira, anei ngā tohutohu a Ranapia hei karo i te ringa o te ture
“Kimihia tētahi kaumātua, kuia rānei ki tō marae, ki to rohe, ētahi o rātou ka tuhituhi te permit kaimoana. Ki te mōhio koe he kaupapa kei mua i a koe ka haere ruku ika, i mua i tērā.”
