Ko Tainui ngā toa i te tōmana Poiuka Māori o Ngā Hau e Whā

updated Rahia Timutimu

Kua wikitōria a Tainui i te wāhanga wāhine, wāhanga tāne hoki i te whakataetae Poiuka Māori o Ngā Hau e Whā ki Papakura i ēnei rangi whakatā roa.

Koinei te tau tuarua o te tōnamana, kitea ai ngā kapa nō ngā rohe whānui o Aotearoa.

I te wāhanga tāne i tae atu ngā kapa nō Tainui, Ngāpuhi, Ngāti Porou, Te Waka o Counties Manukau me Tūhoe.

I te wāhanga wāhine, nō Ngāti Porou, Ngā Kuki, Tainui, Ngāpuhi me Ngāti Kahungunu ngā kapa.

Ko Tainui tēra i wikitōria i ngā wāhanga e rua, te wāhanga wāhine me te wāhanga tāne.

I whai a Te Kaea i te kapa wāhine o Tainui, e aru ana ki te whai utu ia Ngāpuhi. I turaki a Ngāpuhi ia Tainui i te rā tuatahi, he tekau mā ono ngā oma ki te kotahi.

Nō ngā taone e rua te kapa o Tainui, he haurua o te kapa ka noho ki Kirikiriroa, ko te toe ka noho ki Tāmaki Makaurau. Kāre rātou i tākaro ā kapa i mua i te whakataetae nei.

I riro ia Tainui ngā oma e rua i te timatanga o te tukinga, ā, i noho kaute kore a Ngāpuhi tae rawa ake ki te wāhanga whakamutunga, i reira whai ai te kotahi omanga, heoi he tūreiti noa, kia wikitōria a Tainui wāhine i te whiringa toa, he rua ki te tahi.

Ka whakahaerehia tēnei tōnamana i ia rā whakangā o te Reipa.