Ko te kohikohi putea ma Lifeline

He kaiwhakahau i te taupā mate momori e eke pahikara ana i te roanga ake o te motu ki te kohikohi putea ma te hunga nana ia i manāki i tōna wa taumaha. Inā toru tau ki muri i whātoro atu a Ariki Gerrard  ki ngā ringa awhina a Lifeline, na rātou ia i whakaora. 

He rā e kore e wareware i a Gerrard. 

Ko tā Gerrard kōrero, "Kihai au i kite i te atāhua o te rā ā i te kōkō o tōku manawa i te tino pouri au, e kore taea te ora mai anō. I te whakāro au kia wehe i tēnei ao, kua hemo katoa ahau ko tāku e hiahia nei kia tutuki taku waka kia mate au."

I tino pokea tōna oranga e te mate pāpouri.

Ko tā Gerrard anō, "I taku hokinga mai i Ahitereiria i te tino ngaro au i tōku ake kāinga, Kaore  ngā mea katoa i pai ki ahau i taua wa, i ngaro au i taku turanga mahi, kaore au i noho ngātahi me tōku whānau i te mea i ngaro haere au i te āhua o te nohonga Ahitereiria me te momo o te whai putea nui me ērā ahuatanga katoa."

Ā, maringa nui ia i whātoro te ringa awhina, kia noho ia i te oranga pumau.

Anei tā Gerrard mo tana whai awhina, "I tuku awhina ki a kūkara koira tāku i mōhiotia nei ahau i taua wa, ā i whakairia mai ko Lifeline."

Inaianei e eke pahikara ana ia mai i Te Rerenga Wairua ki Motu-pōhue, ko te kohikohi putea ma Lifeline te take.  

Ko tā te kawhakahaere haumanu ki Lifeline a Renee Mathews, "Kaore te kāwanatanga e tuku putea taunaki hēoi me ētahi atu rātonga roopu hoki. Ka whakawhirinaki mātou i ngā tarati, putea taunaki me ngā putea ka tākohatia mai, me ngā kohinga putea."

He karere nui ta Gerrard ki te motu.

"He pai tonu ki te whai awhina, he pai tonu ki te kōrero ki to māmā, ki tō hoa wahine rānei, ā haria atu te kuri mo te hikoi me te kōrero ki a koe anō, he pai tonu me whakaputa ki waho."

E ono ngā rā a Gerrard i tēnei haerenga motuhake āna, ā, kua oti kē tana kohi i te kotahi mano, o te kotahi me te hāwhe mano e hiahia nei ia. Ka taea te marea te tākoha ki everydayhero.com.