Ko te mana ki te wai me ngā take whare ngā take nui i kōrerohia ki Te Kāhui Rangatira ā Iwi

Iwi leaders at Iwi Chairs Forum in Tauranga

Ko te mana tohatoha i te wai me te whakatarewa i te hoko a te kawanatanga i ngā whare kaporeihana ētahi o ngā take nui i āta kōrerohia e Te Kāhui Rangatira a Iwi ki tana hui i Tauranga.

I tae atu te pirimia tuarua a Bill English me te Minita Take Taiao a Nick Smith, ā, tūturu i kotahi atu te kōrero a ngā rangatira ā-iwi ki aua māngai karauna mō ngā take huhua kei te aroaro.

Kua roa nei Te Kāhui Rangatira a Iwi me ngā Minita Karauna e kōrero ana mo te mana ki te wai - nāreira e ai ki a Ta Toby Curtis kua pau haere te wā ki ngā mihimihi.

Tuturu ko te karanga ki ngā Minita kia tukua ki te iwi Māori he mana tohatoha i te wai, he mana e puritia ana i tēnei wā e te kaunihera a rohe - ko te āki a Nick Smith, kōrero ki aua kaunihera rā.

Ko te rongoa e ai ki te Minita ko tana pire hou mō te ture tiaki i te taiao. Hei tāna mā reira whai mana ai nga iwi.

Ko te take whare tētahi atu kaupapa i kōrerohia ki ngā minita. Kei te pīrangi Te Kahui Rangatira a Iwi kia whakatārewahia tā te kāwanatanga hoko i ngā whare kaporeihana - kia tau rā anō tētahi whakaaetanga hokohoko i waenga i a raua.

E ai ki a Willie Te Aho, ehara i te kaupapa mahi pūtea noa mā ngā iwi - engari kē he ara toko i te ora mō o rātou uri.

I tēnei wā ara ētahi iwi kua whai mana hoko tuatahi i ngā whare kaporeihana, mā te wā ka kite pēnā ka whakawhānuitia tēnā e te kāwanatanga ki ngā iwi puta i te motu.