Ko te rangi tuatahi tēnei mō ngā kaihoe pakeke ki te Whakataetae Waka Ama ā-motu ki Karāpiro. I tū ngā reihi takiono kotahi mano mita, takingahuru mā rua rima rau mita anō hoki.
Kua tino eke te kounga o ngā reihi i tēnei tau, ā, i pērā hoki ngā whiringa toa tekau mā rua. Ko te mea nui mō ēnei reihi ko te mahi ngātahi a ngā kaihoe tekau mā rua, he āhuatanga kua mau pai nei i ngā wāhanga pakeke.
Ko ngā reihi W6 rima rau mita te roa te aronga matua hei te rangi whakamutunga āpōpō, kua oti ngā reihi whiringa, ā, kei te haere ko ngā whiringa whāiti me ngā whiringa toa.
E toru noa ngā kapa i uru ki te rēhi masters mā ngā tāne engari he tata ngā kapa tae noa ki ngā mita whakamutunga, kātahi ka puta mai te autaia o Vaka Manu. Ko Tūrangawaewae tēnā i oti tuarua mai.
Ahakoa harikoa ana rātou kua kapohia karapīpititia nei ngā mētara koura e ono, he āhuatanga anō e whakatenatena ana i a rātou.
Ki ngā wāhine matua ināianei, i kitea te autaia o te kapa hōu nō Porirua a PCKC. Whakahirahira ana te tauwhāinga mai anō i te tīmatanga a mutu noa, kia puta rangatira ai rātou, ā, ko Waka Life Extreme nō Waikato i muri tata.
Hei tā Maria Collier nō te kapa PCKC, "Koina te wā tuatahi i rēhi tahi mātou katoa. Koirā te tino ngako o tēnei rēhi, ko te whanaungatanga me te kotahitanga."
Ko Horouta te kapa toa o tērā tau i tēnei reihi o ngā tane i te wāhanga pakeke matua engari ko te kapa i te ara tuawhā a Te Rawiri nō Ruamatā i eke panuku. He tohu hoki hei maumahara i tō rātou hoa kaihoe a Rawiri Rangitauira i hinga i tērā tau.
E ai ki a Wairangi Jones nō te kapa o Ruamatā, "Ko tēnei he whakamaumahara mōna, whakanuia ai āna mahi tautoko i a mātou. Nōna te whakaaro i te tīmatatanga, me pēhea ngā mahi haere tonu, haere tonu, ā, kua puāwaitia. Nā reira kua harikoa te ngākau."
Ki te taha ki ngā wāhine, he reihi tata anō i kitea i waenga i te ara tuatahi, i a Horouta me te ara tuawhā, i a Aroca Pow. Heoi ko ngā wāhine nō Tāmaki Makaurau i whakaputa ihu kia wikitōria ai i tēnei taitara whakahirahira.
