Ko Te Rūnanga o Ngāti Whatua pea tētahi o ngā kaiwhakaahu whare hōu ki Tāmaki Makaurau

Ko Te Rūnanga o Ngāti Whatua pea tētahi o ngā kaiwhakaahu whare hōu ki Tāmaki Makaurau, whai muri i te waitohutanga o tētahi kawenata whakaae ki waenga i a rātou me te Minita Take Whare a Nick Smith.

He kawenata e whai mana hoko tuatahi ai ngā mana whenua tekau mā toru o Tāmaki Makaurau ki ngā whenua ka whakawhanakehia ki te whakatū whare kāwanatanga.

E whā marama ki muri, ko te mahi huna tera a Minita Nick Smith hei kukume i te whāriki i o rātou waewae. Engari inaianei kua rāoa ia i āna kupu.

E ai ki a Tama Te Rangi, “I roto pea i tana huri wawe i wareware kīhai rānei i whai whakaaro te noho ngātahi.”

E ai ki te whakaetanga i waenga i te kāwanatanga me Ngā Mana Whenua o Tamaki Makaurau, kei te rōpū ra te mana hoko tuatahi mena ka hiahia te kawanatanga ki te whakawhanake whenua mō te whakatū whare kaporeihana. Hei tā Tame Te Rangi, ehara i te kaupapa whaihua.

Hei tā Te Rangi, “Kaua tātou e pōhēhē mā tēnei kaupapa e maringi mai ana te hua o te pūtea ki roto i ngā rōpū a iwi nei.”

I ngā wiki kua hipa, ka whakatakoto a Waikato Tainui i te manuka mō te rohe o Tāmaki Makaurau.

Te ahua nei, ka kōrori anō pea tēnei whakaetanga i te kōhua.

Ki tā Te Rangi, “He kaupapa ake atu anō pea wa Waikato Tainui mō ngā whenua kei raro i to rātou mana tērā pea he huarahi ka puta ake a muri ake nei ki te mahi ngātahi me ngā rōpū i roto i ngā mana whānau o Tāmaki nei e tāea te mahi ngātahi me rātou.”

Ka haere tonu ngā mahi whakawhanake whare a te Kāwanatanga, hēoi kā kitea pea ngā iwi hei hoa whakawhanake hei ngā rā ki tua.