Kei te rangahau tētahi rōpū Māori i ngā ara hei whakaū i te mana me te tino rangatiratanga o ngā whānau, hapū, otirā o te iwi Māori whānui tonu ki te kai.
Kua riro atu i te rōpū Māori o REKA kei Te Moana-a-Toi, ētahi pūtea mai i te Kaunihera Rangahau Hauora o Aotearoa, ā, ko tā rātou e tūmanako nei, mā ā rātou mahi, ka pai ake ai te whakamahi kai a ngāi Māori whānui tonu.
I whakatākotoria tētahi mārā ki muri i te marae o Rangataua hei whāngai i ngā whānau o Ngāti Rangataua mo ngā tau maha, he tūahua e hiahiatia ana e te heamana o REKA, e Mate Heitia, te whakawhānui ake.
Hei tā Mate Heitia, “Ko ngā tatauranga e mea ana, kāre e tāea e mātou te whāngai i a mātou, ahakoa te nui o a tātau whenua.”
Tata ki te rua mano rau te pūtea kua riro atu i te poari o REKA mai i te kaunihera rangahau o Aotearoa hei hiki ake i a ngāi Māori ki te mahi kai Māori.
I roto i ngā tau e ono kua kōkirihia e REKA ngā kaupapa whakatipu kai ki runga i ngā Marae i te rohe o Te Moana nui a Toi, pēnei i tētahi māra ki Te Whare o Toroa. E hāpai ana i te mana me te tino rangatiratanga o ā rātou mahi kai.
E mea ana a Mate Heitia, “Ko tō tātau oranga he mea tito i ngā tau kotahi mano ki muri, kei to tātau whakapapa, mai a Papatuanuku me Ranginui, kei reira tō tātau oranga.”
E ai ki te Whakaminenga o te ao, ka mimiti haere te kai hei te tau rua mano, toru tekau.
Ko tā REKA e hiahia ana, mā āna rangahau ka hoki mai ngā kōrero tuku iho a te Māori mo te whakatipu kai.
