Kua tau ki te waha o ngā Highlanders te wainene o angitu i tā rātau turakitanga o te kapa Hurricanes e 21-14 i mua i te aroaro neke atu i te 30,000 kaimātakitaki i te Pōneke inapō.
Kua whakamākūkūtia te taurakitanga 20 tau te roa.
Hei tā te Kāpene o Te Kapa Highlanders a Nasi Manu i pau marika tōnā hau, me te mea hoki, ko tērā te whainga matua, kia puta toa mai tōnā kapa.
I rere marika te wairua whakanui, ā, hei tā te uri o Ngāti Kahungunu a Aaron Smith, ahakoa te ohorere o ngā hua, i te mutunga iho, i tutuki tērā i tūmanakotia.
Ahakoa ko ngā Hurricanes te kapa makau i te tukinga nei, marama te kite i o rātau kare ā roto i te taunga o te puehu.
Hei tā te Kāpene o te Kapa Hurricanes a Conrad Smith me whai whakaaro nui tōnū rātou ahakoa ngā hua.
Nā te uri o Ngāpuhi o te Kapa Highlanders a Elliot Dixon i whakakapi i te haurua, ko ngā tatau he 13-5
Ahakoa i areare mai he āputa ki a Julian Savea o Te Kapa Hurricanes i te koko mauī kia puta tana kapa ki mua, heoi auare ake.
