Ko te whai i ngā mahi a te rata mātai hinengaro e kātata ana

Regan Paranihi

E kātata atu ana a Whiti Hoori (Ngāpuhi) ki te aru i tana moemoea ki te ako i ngā mahi a te tākuta mātai roro, nō muri i te whakawhiwhinga ōna ki te tohu tiketike a Te Whare Wānanga o Tāmaki Makaurau.

Tekau mā whitu ōna tau, ā mai anō tōna manarū ki ngā mahi a te tinana, ka mutu e koa ana ia i te whai hua o āna mahi nui. 

Heoi, ehara i te mea, i māmā noa te ara ki a Hoori, e noho atu ana ki te hapori iti o Waikare i Te Taitokerau, he tawhiti te haere ki Whangarei ia rā, ia rā kia nanao atu ki te mātauranga e tika ana. 

Ka kuraina ia ki Te Kāreti Katorika o Pomapārie i Whangarei, he hiahia nōna ki ngā akoranga a te hāhi Katorika, ā kaare he whiringa kē atu māna i Te Taitokerau.

Ko te karahipi $20,000 ka whakangāwari i ngā utu noho ki Tāmaki Makaurau.

E ai ki te māmā o Hoori, ki a Vicky Lawson, he whakatutukinga autaia tēnei e whakatauira ana i te kōrero, ka taea e ngā tamariki nō ngā hapori iti ki tuawhenua ngā taumata katoa te eke.

Ka tīmata a Hoori ki te whai i tāna tohu paetahi Mātai Hauora hei te Hui Tanguru.

Ko te tohu tiketike a Te Whare Wānanga o Tāmaki Makaurau i tohua ki ētahi ākonga anō hoki i Kaiata, i Kerikeri, i Whangarei.