Ko te whakatūranga anō i te Kaitiaki Māori

Kua pānuitia i tēnei rā e te Minita Whanaketanga Māori, e Willie Jackson, te whakatūranga anō i a Dr Charlotte Severne hei Kaitiaki Māori mō Te Tumu Paeroa mō ngā tau e rima.

He uri nō Ngāti Tūwharetoa, nō Ngāi Tūhoe hoki, ā, he mātauranga kauanuanu kua oti i a ia he Tohu Kairangi mō te mātai aronuku i te Whare Wānanga o Tāmaki Makaurau, ā, nō te tau 2018 i whakawhiwhia e ia ki tēnei tūranga mō ngā tau e toru.  Ko Dr Severne te wahine tuatahi ki te hautū i te tōpūtanga.

“He kaitaunaki kaha, he kaitautoko hoki a Dr Severne ki te āwhina i ngā hinonga rawa Māori ki te whakamahi i te pūtaiao me te rangahau ki te whakahaere toitū, ki te whakawhanake hoki i ā rātou taonga tuku iho.

“Ko tōna mātau i roto i ngā pakihi Māori hei kaitohutohu pūtaiao, hei mema mana whakahaere ki te taha o ngā hinonga pūngao, tini a Tangaroa, pāmu hoki, pērā i āna tūranga ki te Lake Rotoaira Trust me te Opepe Farm Trust, e whakamanawa ana au mā tana whakatūranga anō e hāpai tonu te mahi o Te Tumu Paeroa,” te kī a Willie Jackson.

He ratonga ngaio kaitiaki a Te Tumu Paeroa mō te Kaitiaki Māori, mōna e whakahaere ana nui atu i ngā heketā 90,000 o ngā whenua Māori herekore me ētahi atu rawa mō ngā kaiwhaipānga tata ki te 100,000 tae noa ki ngā tarahati Māori, ki ētahi atu hinonga hoki.