Ko te whāngai ngā kaupapa Māori ki ngā mauhere pea te rongoa mō ngā whawhai ki rō whare herehere

Kua puta mai tētahi o ngā kaiarataki kaupapa Māori o mua o Serco me te kī ake, i matapaetia rā te pupūnga o te riri ki te kore ngā kaupapa Māori i roto i ngā whare herehere.

Ehara i te mea ohorere te mahutatanga mai o te riri, me ngā whanonga hianga i rō Whare Herehere ki a Awhitia Mihaere.

Hei tā Mihaere ko te mea kē, me whai whakaaro nui atu ngā kaupapa o roto i ngā whare herehere me te aronga hoki o ngā kaupapa whakapiki pūkenga mō ngā apiha ki ngā kaupapa Māori.

I tērā wiki tonu, i puta i te kaiarataki kaupapa Māori o mua, o te Whare Herehere o Maungawhau, a Hemana Waaka me te kī ake me aro atu te Kāwanatanga ki te whakaaro mā ngā iwi Māori e whakahaere i ngā Whare Herehere matua, ā, e tautoko pau te kaha ana hoki a Mihaere i tēnā.

Hēio anō hei tā Pirimia, tā John Key ka tāea e ngā pakihi te tuku tono ki te whakahaere Whare Herehere, ēngari ēhara i te mea he take a iwi tēnei.

Hei tā Mihaere, ki te whai wāhi atu ngā iwi ki te whakahaere i ngā whare herehere i te ngaronga o Serco, me whai mana ngā Mana Whenua ki ngā taumata whakahaere.