Ko Waikato te tira i whakaīngoatia hei toa o te Whakataetae Pā Whutupōro

Wikitōria Day

E rua ngā kapa taiea i eke ki te whiringa toa o te whakataetae pā whutupōro inā tata nei.

I tuki rae ki te rae a Counties Manukau me Waikato i te wāhanga tāne whānui, heoi ko Waikato kē te tira i whakaingoatia hei toa. I reira a Te Kāea e mātakitaki ana i te kēmu hiamo nei.

I mau ngā whatu o te hākerekere ki tētahi o ngā tino kēmu whiringa toa o te whakataetae.

I pūkākā tā Waikato puta atu ki te papa tākaro, ā, kāre hoki i roa, ka whakairihia e rātau he piro ki te rārangi tatau.

Heoi, i rikarika a Counties kia whai piro anō, ā, i tapakō iho te kaitākaro nei ki te papa whai muri tata iho.

I tere ake hoki rātau i tō rātau hoariri, nā wai, ka whai hua ki te kokonga.

I noho whakamīharo ngā kaimātakitaki i tēnei pironga a Counties. I rere ia ki tua atu i te rārangi piro.

I kitea e Waikato he wāhi māheahea e māmā ai tā rātau whakatau i te pōro ki te papa, ā, ka whai piro.

Heoi, ka puta i a Counties te hiakai nui kia angitū.

Kāre a Waikato mō te tuku kia toa a Counties. He hua anō i puta ki a rātau.

Ā, ko tēnei piro pea nā Counties te hua māmā rawa o te kēmu.

I te taenga mai o te haurua tuarua, ka tino kitea te pīkoko o ngā kapa e rua. Piro atu, piro mai, ko Waikato tērā i kapo ake i te nuinga o ngā piro i tēnei wāhanga.

I pakanga tonu te tira nō Tāmaki Makaurau engari tē taea te eke ki te kōunga o te tākaro i whakaatutia mai e te hoariri. Ko Waikato te toa, he iwa ki te whitu.