Marama Davidson

Inā te mano tini o ngā tauira huri noa i te ao ka whai wāhi atu ki te whakatu porotēhi, kia āhei rātou te whakatenatena i ngā kaitōrangapū ki te āta tiro atu ki ngā take āhuarangi. Hei te wiki e tu mai nei ka whai ngā tauira o Aotearoa i ēnei whakatauira. Ko te pātai ia mēnā e whakaae ana a Aotearoa whānui ki te whakawātea mai ngā tauira ki te whai i ēnei āhuatanga.
 

Kei te kitea inainei i ngā pūngao kōmaru ki roto i ngā kura o te motu. Ko te kura tuatahi o Maungaraki ki Pōneke tētahi kura e whiwhi ana ki ngā hua, i penapena ai i te rima mano tāra i te tau kua hori.   
 

Ki te tonga o Tāmaki, kua tae ā-tinana atu te Minita o Whānau Ora a Peeni Henare ki te marae o Ngā Whare Waatea i te rā whakamutunga hei tuari pouaka kai, nā te tono a te Kaiwhakahaere o Whānau Ora ki Te Uepu Noho Taone o Manukau i tuku.

Kei te hiahia hoki te kaiwhakahaere, a Veronica Henare ki te akiaki i te kāwanatanga kia kaha ake te tautoko ki ngā whānau pōkaikaha i te wā kirihimete.

He kōrero whakatūpato mai tētehi whānau tokowhā ki te hunga haere ki tāwāhi ki te whakatikatika i ngā whakarite haerenga hei te wā o ngā hararei.

Kua hōhā te tokowhā i te whakatārewatanga o ā rātou haerenga i ngā rā whakatā nei, nā te hapa o tētahi kamupene whakahaere wakarererangi.

Ki Tāmaki Makaurau, kua tīmata kē ngā whakatairanga manamanahau o te wā mō ngā whānau e toru rau o te hunga mauhere. Mō te wā tuatahi ka tū ngā whakamānawa o te kirihimete o Anahera Rākau, ki te marae o Mataatua i Māngere.

Kua kōwhiria a Pounamu Wharehinga o Te Kura Kaupapa Māori o Horouta Wānanga ki Tūranganui a Kiwa, hei māngai ki te Paremata Rangatahi o Aotearoa.

Me whakatū e te rōpū Housing & Urban Development ētahi hapori māori. Koinei te whakahau a te Poutaki o Ngāti Whātua o Ōrākei Marae, a Taiaha Hawke.

Kei te āritarita rātou me Ngati Paoa kia mahi ngātahi rātou ko taua rōpū ki te tuku i ngā whare ngāwari te utu ki o rātou uri.

Ko te kapa haka o Te Kāhui Huringa mai i te kura tuatahi o Whinireihana te toa whakaihuwaka hōu o te whakataetae kapa haka ngā kura tuatahi, kura takawaenga hoki o Tāmaki Makaurau.

I eke Te Kura Māori o Ngā Tapuwae ki te taumata tuarua, ko Te Kura takawaenga o Henderson ki te tūnga tuatoru.

Tekau ngā kohanga reo mai i Tāmaki Makaurau me Te Taitokerau ki te papa whakat`ū waewae mo Te Mokotini i te rāwhiti o Tāmaki.

E ai ki te kaumātua o TKR o Te Puau Te Moananui a Kiwa a Tumanako Waiwai ma ngā pakeke anake te whakataetae o Te Matatini engari ko te whakanui i te ahurea māori te kaupapa o Te Mokotini.

Kei te hiahia ngā pou hāpai i te hunga mate wairangi ki te whai i tētahi kaupapa hōu e kī ana "Open Dialogue" kia pai ake ai tā rātou āwhina i ngā whānau whaiora. Hei tā te Rōpū Tautoko i Ngā Whānau o Tāmaki Makaurau, koirā te huarahi whai kiko i Ahitereiria, hei manaaki i te katoa o te whānau.

E tōtara wāhi rua ana ngā whakaaro o te marea i te tonga o Tāmaki Makaurau mō te whai hua a te Māori i te kāwanatanga tūhono hōu nei. He kotahi tau kua hipa i te aranga ake o Reipa me Aotearoa Tuatahi hei kāwanatanga tūhono.

I whakatuwheratia e te kaiarahi takirua o te Pāti Kākariki e Marama Davidson he kaupapa whāngai aroha ki te punaha tautoko ā hapori i te rā nei. He kaupapa tēnei ka āhei ngā tini hapori o te motu te mahi tahi ki te whakakore i te pōharatanga ki Aotearoa nei.