Ko te rāngai hauora Māori e kimi āwhina atu ana i te rāngai pāpāho Māori me ngā mātanga reo Māori ki te whakakaha ake i te whakamahinga o te reo Māori i te ao hauora.

He whakahaere wānanga te mahi a te ratonga hauora Māori tūmatanui, a Hāpai Te Hauora ki Rotorua i tēnei rā ki te kōkiri i te kaupapa me te whakaaro, mā te reo hoki e ora ake ai ngā hapori.

Hei tā Michale Naera, heamana o Te Mana Hauora, he uaua ki ētahi tūroro Māori te mārama ki ngā rerenga kōrero hauora reo pākeha, ā, ka māmā ake me he Māori te reo.

Whakaahua / Kōnae

Ko te mātau ki te reo Māori, ahurea hoki ka herea mā ngā kaiako ā tōna wā, koia te whakatau ki Te Kōmihana Uiuinga a te Karauna ki ngā Tūkinotanga i raro i te Karauna, e ai ki tētahi pūrongo a Te Reo Irirangi o Aotearoa.

Kua tū te ringa a te kaikaunihera nō Ruapehu a Elijah Pue, ki te whai i te tūranga koromatua i ngā Kōwhiringa Pōti ā Rohe, ā ko tāna, kaua e pōhēhē he whai noa tērā mō te hunga pakeke.

Ki te tutuki e te uri o Ngāti Rangi i tāna e whai nā, ka tū ia hei koromatua pōtiki rawa puta noa i a Aotearoa.

He rua tekau mā waru tau noa te pakeke ā Elijah, ā kua kotahi wāhanga (toru tau) noa ia e tū ana hei kaikaunihera. Engari ko tāna ko ngā pūkenga, me ngā wawata o te tangata te aronga nui.

Ko Te Reo Irirangi o Tainui i Ngāruawāhia ka whakanui i tana ekenga ki te 30 tau i tēnei wiki. I kōrero mai te kaiwhakapaoho o te reo irirangi nei, a Matutaera Herangi ki Te Ao Māori i roto i āna whakapaohotanga i te whakataetae waka ama ā-motu i te rā nei.

Ko tā Herangi, he tuku mihi ki ngā waha reo, arā ki ngā kaiwhakapaoho i te wāhanga o te ata, ki a Womble rāua ko Blossom, ki a Dusty Nepia, ki a Pohewa Tamati, ki a Mamae Takerei, ki a Koroneihana Cooper. Ka whakamārama mai a Herangi i te ahurei o te reo irirangi me tōna hiranga ki roto o Waikato-Tainui i ēnei rā.

Nā te nui o ngā kaihoe wāhine i te Whakataetae Waka Ama o te Motu ki Karāpiro, kua whakatūhia e Cercival Screening Waikato he wāhi taupua e māmā ake ai te haere a te wahine kia tirohia ai rātau mō te mate pukupuku ki te waha whare tangata. 

Ko te whakatau a Te Taraipiunara o Waitangi, i mahue i te Karauna āna herenga kia kahurangi te tū. E karanga ana ia ki te Karauna kia whakatārewahia tāna whakataunga me Pare Hauraki, kia tika rā anō ai āna whakaritenga.

I roto i āna tūtohutanga, ko tāna e mea ana, “Ko te pire ka whakamana i te Whakataunga a Te Kohinga o Pare Hauraki, i te kawenata whakataunga a te iwi o Hauraki anō hoki, ka kore e koke whakamua, kia tau rā anō ngā take mautohe ki tētahi tukanga e tika ana mō ngā kerēme whakawhiti."

Ko Piripi Parker (Ngāti Toarangatira) i mate ohorere i te Rātapu ki muri, e 23 ōna tau. Ko te pōuri anō, kaare anō kia hipa te wiki kotahi nō tana mārena ki tōna whaiaipo mai anō i te kura e piri ana, a Cian, ka mahue mai me ā rāua tama e rua, a Xavier (5) rāua ko Mason (3).  

E ai ki a ngā whakamārama ki Te Ao, kua rāhuitia a motu Whakaari. He karakia i whakahaeretia ki te puaha o Ohinemataora i te whā karaka i te ata nei.