Ko te takitini o ēnei toa i karapinepine mai ki te whakatau anō i ngā waewae o te tokorua kirikawa nei.
“Ko te kōrero o tā tātou Pāpā ki te manuhiri i tae mai i tēnei rā – ‘ehara tēnei he toa takitahi engari he toa takitini’. Nā reira ko mātou te takitini kua tū whakahīhī i tēnei rā,” te kōrero a te Tumuaki o Maukura, a Nathan Durie.
Pōhiritia ai a Carys Dallinger rāua ko Kaylyn Takitimu-Cook e tō rāua kura i tō rāua aurakitanga mai i Ngā Orimipia Rangatahi. Ā, e mau ana ki ngā kakī ngā taonga nui.
Ehara i te mea he kai paraoa noa iho te mahi, hai tā Takitimu-Cook, he mahi nui te pakanga atu ki a Wīwī i ngā whiringa toa.
E poho kererū ana te Tumuaki o Manukura, a Nathan Durie, e ai ki a ia he whakatinanatanga tēnei tutukihanga a te tokorua nei i ngā whāinga nō te wawatatanga tuatahitanga o tēnei kura.
“Harikoa rawa ahau i te whiwhinga o ēnei tokorua, i te mea i te wā i whakaoū i tā mātau kaupapa a Manukura, ko tēnei tētehi i ngā tino wawata ka tū ā tātou tamariki ki ngā atamira, me kī, o te ao i roto i ngā kaupapa hākinakina,” te kōrero a Durie.
