Kua auraki te kiwi rua rau ki te wao nui

updated

He raro motuhake mō te hōtaka whakaora i te kiwi ki Maungataniwha i Te Matau a Māui, nā te mea, kua auraki tō rātou kiwi rua rau ki te wao nui.

Ehara i te mea koinei he pouaka noa iho, kei roto, e noho ana he kura kamehameha.

Ko Tānekaha tōna ingoa, koia te punua kiwi e rua rau i waihape atu ki tōna ūkaipō i konei, i te wao nui o Maungataniwha.

Tērā te tūpono ka whai oranga ia, he iwa rau karamu te taumaha, nā reira, ka pakari a ia ki te ārai atu i ōna hoariri, arā te toriura me aua momo.

Nō Lynda Holsiwich te maringa nui o te tapa i aia, he ingoa nā tōna kaihautū mahi i pākia e te mate pukupuku.

E waru ngā tau ki muri i mū katoa te puihi nei, horekau he manu e waiata ana. Engari, kua tīni taua āhuatanga ināianei, he toru tekau mā rima ngā pīpī kiwi i whānau mai ia tau, he hoa mo ngā manu maha e noho ana ki konei.